P3.4 milyon shabu nasakmit

CEBU, Philippines — Mokabat kapin P3 milyones nga kantidad sa gidudahang shabu ang nasakmit sa buwag nga operasyon sa kapolisan diha sa Dakbayan sa Talisay ug sa Lapu-Lapu City nga niresulta sa pagkasikop sa mga suspetsado.

Sa operasyon sa Barangay Lawaan 2 sa Talisay City, P2.4 milyones nga balor sa drugas ang nasakmit sa grupo ni Police Lt. Colonel Marlu Conag, sa Provincial Intelligence Branch kagahapon sa kaadlawon adlaw nga lunes.

Ang nasikop sila si Rogelio Amion, 42; Lyndon Lastimosa; Anthony Rijan; John Amion ug Rex Aldia, kinsa gidala sa tambalanan human nabali ang tiil kay milayat kini gikan sa ikaduhang andana aron unta moikyas.

Tulo ka dagkong putos, upat medium packs sa gituohang shabu nga motimbang og 360 gramos nga mobalor og P2.4 milyones base sa Dangerous Drug Board Value, buy bust money, bag nga gisudlan sa drugas, lighter, gunting, timbangan ug uban pa ang nasakmit. Si Provincial Director Police Colonel Rhoderick Mariano mimando nga pangusgan ang seguridad ug operasyon batok illegal nga drugas nga posibleng ipakatap atol sa pista.

Gitug-an ni Conag, nga si Lastimosa adunay warrant of arrest gikan sa Branch 65 sa Talisay City tungod  sa illegal nga drugas ug gituohang sakop kini sa self-confessed drug lord Franz Sabalones.

Samtang si Aldia giingong sabog pa sa illegal nga drugas paglayat niini gikan sa balay. Matud ni Conag, gihimong suyopanan ni Aldia ang iyang balay aron makakwarta ug makalibre sab og suyop.

Samtang lapas P1 milyon nga gidudahang shabu sab ang nasakmit sa mga sakop sa Presinto 3  sa Mandaue  City Police Office (MCPO)  gikan sa usa ka High Value Target (HVT) nga si Carlo Alfanta.

Si Police Captain James Conaco hepe sa Presinto 3 sa MCPO maoy nangulo sa operasyon. Nakuha gikan sa suspek ang 120 gramong gidudahang shabu sulod sa ilang panimalay.

Gawas kang Alfanta, naluwas sab sa kapolisan ang upat ka mga menor de edad nga nanuyop sa balay sa suspek. (/IBM)(BANATNEWS)