Usa nasamdan sa Operation Second Chance

CEBU, Philippines — Usa ang samdan sa nahitabong komosyon sulod sa Cebu City Operation Second Chance niadtong Huwebes sa hapon. Nakaangkon kini og samad sa buko-buko human gidunggab gamit ang toothbrush.

Human sa maong insidente gibisita ni Konsehal Dave Tumulak, miyembro sa Committee on Peace and Order ang pasilidad kagahapon.

Alas 2 sa hapon nahitabo ang komosyon sa dihang duha ka mga bata nga giingong dunay personal nga panagbingkil ang nag-abot.

Nasayran nga managlahi og dormitory kadtong mga batan-on nga mo-18 anyos na unya ug kadtong mga menor de edad pa lang.

Matud pa ang duha ka bata nga dunay panagbingkil nag-abot sa grounds dihang gipaadto sila sa dapit alang sa inspeksyon nga himoon sa usa sa mga dormitoryo.

Giingong dugay ng may bikil ang duha nga wala mahilot.

“Ang house parent diri mopatuman pud isip usa ka inahan para maestoryahan ang mga bata og dunay mga kasungian tali sa ilang mga kauban ma-resolve dayon, dili magdako,”ni Tumulak pa.

Human sa maong hitabo, kauban sa Department og Social Welfare and Services sa siyudad ug kadagkoan sa OSC nasabutan  nga pahingusgan ang relasyon tali sa houseparent ug sa mga bata, paghigpit sa seguridad, ug kanunayon ang greyhound operations.

Ang Officer-In-Charge sa OSC Ambrosio Ibones miingon nga misunderstanding lang gyud ang nahitabo niadtong Huwebes.

Nagplano sab nga pun-an ang social workers tungod kay sa pagkakaron duha lang ang ilang social workers nga moatiman sa kapin 80 ka mga bata sa maong pasilidad.

Nagtinguha sab sila og magbutang og psychologist sa maong pasildiad aron makatabang sab sa mga bata. (/IBM)(BANATNEWS)