Unom sikop sa buy bust lakip niini nurse

CEBU, Philippines – Nasikop ang usa ka kanhi nurse sa gipahigayong buy bust operation sa Barangay Poblacion, Lungsod sa Sibonga niadtong Martes sa hapon.

Ang suspetsado nga subject sa buy bust mao si Alfonso Caparida Guaves, Jr. alyas “Barabas”, 41, walay trabaho ug residente sa maong lugar.

Samtang ang kapuyo niini mao si Maria Theresa Simpoo Dillon, 37, registered nurse ug residente sa maong dapit.

Ang mga suspetsado giingong nakuhaan og duha ka paketeng shabu. ga drogas.

Si Police Major Alfredo Kuhay, hepe sa Sibong Police Station nibutyag nga si Guaves ang ilang target apan atol sa transaksiyon nakita lakip si Dillion sa maong pagpamaligya.

Ang duha giingong nalangkub sa station level drug watch list sa Sibonga.

Dugang ni Kuhay nga giingong didto sa abroad si Dillon apan na-deport kini human nagpositibo sa ginadiling drugas.

Sa laing bahin, nasikop kagahapon sa buntag diha sa Sitio Tambis, Barangay Pooc, Dakbayan sa Talisay ang magsuong Arvin Ryan, 33, ug Alexis Rey Abendan, 36 ug ang giingong ilang collector sa halin sa ilegal nga drugas nga si Marlyn Zafra, 22, usa ka mabdos. Ang tulo parehong mga residente sa maong dapit.

Ang mga suspetsado nakuhaan kini og drugas nga nitambang ngadto sa 10.14 gramos nga nikabat ngadto sa P68,952 ug drug paraphernalia.

Si Zafra kinsa giingong nakahuman sa kurso education mokuha na unta kini og board exam.

Samtang usa ka parking attendant ang nasikop sa kapolisan sa Abellana Police Station diha P. DEL Rosario Extension, Barangay Sambag 1, Dakbayan sa Sugbo atol sa buy bust operation niadtong Martes sa gabii.

Ang nasikop mao si John Robert Janubas, alias “Jhong”, high value target, nalakip sa watchlist, ulitawo, 18-anyos, taga Barangay Ermita Proper.

Nasakmit gikan kang Janubas ang mga pinutos nga ginadiling drugas nga nitimbang ug 30.17gramos ug nibalor ngadto sa P208 mil ug buy bust money. (Gabriel C. Bonjoc, Rowena D. Capistrano/BDB)(BANAT NEWS)