Konseho niuyon nga Olango ubos sa state of calamity

CEBU, Philippines — Makadawat og hinabang gikan kagamhanan sa Dakbayan sa Lapu-Lapu ang mga molupyo sa 11 ka barangay sa Isla sa Olango.

Kini nunot sa pagdeklarar sa konseho sa siyudad nga ipaubos sa state of calamity ang tibuok isla. Sa niaging semana gideklarar sab sa City Disaster Risk Reduction and Management Council (CDRRMC) ang tibuok isla nga ubos sa state of calamity dihang nasinati ang kusog nga hangin ug walay gipabiyahe nga sakyanan sa kadagatan. Apan ang deklarasyon sa CDRRMC kinahanglan gihapon nga aprobahan sa konseho sa siyudad.

Si Konsehal Alexander Gestopa nga sakop sa mayoriya sa konseho nipasabot sa iyang pag-uyon sa pagdeklarar nga state of calamity tungod kay nakita niya ang panginahanglan sa pagtabang sa kagamhanan sa mga molupyo nga naapektohan ang panginabuhi sa dautang panahon. Matud ni Gestopa nga wala kapanagat sulod sa pipila ka semana tungod kay dagku man ang balud sa kadagatan ug daghan kanila ang natanggong sa mainland. Ang resolusyon sa konseho nga giaprobahan mao sab ang naghatag og kahigayunan nga magamit na sa kagamhanan ang P7 milyones nga pundo sa ilang calamity fund alang sa pagpalit og relief goods ug supply alang sa moabot 6,000 ka apektadong molupyo sa 11 ka barangay sa maong isla. (/GMR)(BANATNEWS)