Samsam nasagmuyo, pag-ayo sa Mananga Bridge di pa mahuman
CEBU, Philippines — Nadismaya si Talisay City Mayor Gerald Anthony “Samsam” Gullas Jr. sa kontraktor sa taytayan sa Mananga ug sa taga Department of Public Works and Highways (DPWH).
Kini human dili gyud mahimo sa kontraktor nga mahuman ang pag-ayo sa taytayan karong Agosto 4.
Una niini nipasalig ang DPWH ug ang kontraktor nga ilang humanon ang trabaho sa dili pa ang Ironman karong Agosto 11.
Si Gullas maoy nangunay sa pagpakighinabi sa kontraktor ug sa taga DPWH hinungdan nga daku ang iyang kalipay nga nadungog ang ilang pasalig.
Apan karon lang semanaha nangayo na sab og laing mga semana ang kontraktor aron nga mahuman ang proyekto.
Nisamot ang kasagmuyo ni Gullas dihang walay rason nga gihatag kaniya kun nganong nalangay.
Si Gullas nibisita sa project site niadtong Huwebes sa hapon ug iyang nakita nga ubay-ubay pa gyud nga trabahoonon niini.
Ang batan-ong mayor nangayo og pasaylo ngadto sa katawhan ug motorista nga motaas pa gyud ang pag-antus sa kahuot sa trapiko sa lugar ilabi na sa dakung kalihukan sa paugnat sa kusog.
Gikatakda unta nga mahuman ang proyekto niadto pang buwan sa Marso.
Si Gullas nakaamgo nga dili diay obligado ang DPWH sa pagtubag ngadto kanilang mga mayor ilabi na sa mga kalangay sa mga proyekto.
Nipasalig na sab ang kontraktor ug DPWH nga mahimong ablihan ang kinatibuk-ang taytayan karong Agosto 10 ug 11 aron dili kaayo tantong matanggong ang mga motorista sa dalan apan sirhan ra sab dayun kini human sa kalihukan.
Walay petsa nga gipasalig kun kanus-a gyud mahuman ang proyekto. (/GMR)(BANATNEWS)
- Latest