Kaso pagpalit sa luna sa SRP ipasibog

CEBU, Philippines — Gisugyot sa City Legal Office ngadto sa konseho sa Dakbayan sa Sugbo ang pagsibog sa kasong sibil nga gipasaka batok sa mga kompaniya nga nagpalit sa lote sa South Road Properties.

Si City Attorney Rey Gealon niingon nga ang petition for declaratory relief wala mosunod sa mando sa sertipikasyon batok sa forum shopping maong depektuso kini tungod kay ang kanhi mga sakop sa konseho napakyas sa pagpirma sa petisyon.

Ang legal nga opinyon ipasa ngadto sa konseho sa dakbayan karong adlawa.

Sigun ni Gealon nga si kanhi City Legal Officer Joseph Bernaldez ang nipirma sa verification and certification of non-forum shopping on the authority of Sangguniang Panlungsod Resolution No. 14-1728-2019.

Si Gealon niingon nga ang resolusyon dili kapuli sa espesyal nga gahum sa abogado tungod kay kini usa ka deklarasyon sa sentimento o opinyon sa konseho.

Ang niaging mga sakop sa konseho nisang-at sa petisyon alang sa declaratory relief uban sa gipangayo nga temporary restraining order ug writ of preliminary injunction nga gisang-at niadtong Hunyo 28, ang katapusang adlaw sa dili pa mopuli ang bag-ong administrasyon.

Ang petisyon alang sa declaratory relief gipasaka batok sa SM Prime Holdings, Inc., Ayala Land, Inc., Cebu Holdings, Inc., Filinvest Land, Inc., Filinvest Alabang, Inc., Cyberzone Properties, Inc., Anesy Holdings Corporation, IGold Holdings Incorporation, ug Betterfield Phils. Corporation sa pagbaligya sa 45.5-ektaryang luna sa tuig 2015.

Kahinumduman nga ang consortium sa Ayala Land, Cebu Holdings Inc. ug SM Prime Holdings nipalit og 26.3 ektarya nga luna sa kantidad nga P10 bilyones samtang ang FLI nipalit sa 19.2 ektarya balor og P6.7 bilyones sa 2015 sa panahon ni kanhi mayor ug karon Bise Mayor Michael Rama.

Apan ang Court of Appeals nibasura sa motion for reconsideration nga gisang-at ni Romulo Torres kinsa nikwestiyon sa validity ug legality sa 45.5 ektarya nga pagbaligya sa tuig 2015.

Mga kaalyado sa Bando Osmeña-Pundok Kauswagan ang nipasar sa resolusyon sa niaging buwan aron padayon nga kwestiyunon ang pagbaligya sa yuta ug ipa-nullify ang maong mga kontrata sa syudad. (/GMR)(BANATNEWS)