Kontrata sa Jomara palugwayan ni Labella

CEBU, Philippines – Mohangyo si Cebu City Mayor Edgardo Labella sa Jomara Konstruckt Inc. nga lugwayan ang ilang garbage hauling contract sa siyudad hangtud  sa Hulyo 20.

Ang paglugway sa kontrata maghatag og dalan sa reviewing committee sa pagsusi sa kontrata sa ARN Central Waste Management Inc. kon kini nasubay ba sa balaod.

Ang reviewing committee gipangulohan ni city attorney Rey Gealon uban ni city administrator Floro Casas, Jr.

Sa kasamtangan ang City Legal Office nag-secure sa kontrata sa ARN Central Waste Management Inc. apan wala kini igkita.

Nakuha sa ARN ang hauling contract gikan sa buwan sa Hulyo hangtud sa Disyembre niining tuiga nga nagkantidad og P65 milyones human nitanyag og tipping fee nga P647 matag toneladang basura.

Sayo pa, si Gealon nagkanayon nga susihon ang terms ug conditions sa kontrata ingon man ang special land use permit sa ARN alang sa operasyon sa Material Recovery Facility (MRF) ug engineered sanitary landfill sa Barangay Binaliw.

Nahuman na unta ang kontrata sa maong service provider sa niaging buwan nga nagsugod niadtong Enero niining tuiga.

Sa iyang bahin, si Department of Public Services (DPS) acting head Joel Biton miingon gamiton nila ang nahibiling pundo sa garbage disposal nga nagkantidad og P5 milyones alang sa contract extension sa Jomara.

Sukad ang landfill sa Barangay Inayawan gipasirad-an niadtong Disyembre 2016 ang kagamhanan sa siyudad nagsugod og kontrata sa service provider nga mohakot sa basura.

Si Biton subling niklaro nga walay dumping activity sa landfill ug ang Jomara naggamit sa private transfer station nga nahimutang sa likod nga bahin sa landfill.

Ang ARN Central Waste Management mihangop sa lakang sa kasamtangang administrasyon sa pag-review sa siyudad sa ilang kontrata. (/BDB)(BANAT NEWS)