Duha angol human hapsi og kahoy sa kainom
CEBU, Philippines – Nakaangkon og mga bun-og sa lawas ang manag-uyoan human kini kulataha samtang nag-inom atol sa pagsaulog sa pista sa Barangay Arniña, Lungsod sa Malabuyoc niadtong Miyerkules sa gabii.
Ang biktima mao si Asterio Durngo, 63-anyos ug ang pag-umangkon niini nga si Rico Durngo, 37, construction worker ug parehong residente sa lugar. Matud ni Police Master Sergeant Alvin Enad sa Malabuyoc Police Station ang mga biktima nagkainom sa suspetsado nga si Joel Endab, 28, kinsa ilaha ra usab nga paryente ug nagpuyo usab sa maong barangay.
Taliwala sa ilang panag-inom giingong nagmaoy si Endab ug miingon “kinsay isog?!”.
Si Endab gipugngan nila ni Asterio ug Rico ug gibadlong nga mohilom ug dili mangita og away.
Giingong nasuko si Endab sa manag-uyoan tungod kay gibadlong kini ug namunal og 2X2 ngadto sa mga biktima.
Si Asterio ug Rico nakaangkon og samad sa nawong ug likod human maigo sa pagpamunal daling gipangdala ngadto sa Malabuyoc District Hospital.
Samtang si Endab natingkagol kini sa detention cell sa Malabuyoc Police Station human nasikop sa mga polis nga niresponde. (/BDB)(BANAT NEWS)
- Latest
