‘Shabu’ gipasok sa sampot
CEBU, Philippines — Napaslak hinuon sa lock-up jail ang usa ka 30-anyos nga bisita sa Mandaue City Jail human kini nakuhaan og ilegal nga drugas nga giputos og condom nga gipasok sa iyang sampot, kagahapon sa alas 10:50.
Ang nasikop mao si Paulo Guinto, taga Bo. Luz, Dakbayan sa Sugbo basi sa iyang voter’s ID.
Matud ni Jail Officer 1 Julius Cagas, sa searching area sa MCJ, aduna siyay nakapkapan nga lighter sa atubangan nga bahin sa bulsa sa dinakpan ug mitahan pa kini og usa ka buok nga sigarilyo.
Sumala pa ni Cagas, sa dihang gipahubo na si Guinto, nisiwil ang condom sa iyang sampot hinungdan nga gimanduan kini sa pagtangtang ug pagbitad sa maong condom nga adunay sulod usa ka bulto sa gituohang shabu.
Sa pagkakaron, kasamtangan usa nga gitanggong sa lock-up jail si Guinto alang sa dugang imbestigasyon lakip na usab ang pag-ila ug pagsusi kon kinsa ang gibisitahan niini ug unsay kaso.
Ang nagdumala sa MCJ hugot ang pagbantay ug pagmonitor sa mga tawo nga mosulod sa maong pasilidad nga magdala og kontrabando. (/DILT)(BANATNEWS)
- Latest