P5-milyones shabu nasakmit, 8 sikop

CEBU, Philippines – Duha ka ginang ang nasakmitan og P4.7 milyones nga balor sa drugas atol sa buy-bust operation sa mga awtoridad sa Sitio Kamanggahan, Labangon, Dakbayan sa Sugbo niadtong Martes sa hapon.

Ang nasikop mao sila si Dolores Suchiza alyas Inday, 38, ug Lolita Mosqueda, 64, pulos minyo nga taga Sitio Mahayahay, Barangay Calamba sa maong dakbayan.

Nasakmit gikan sa mga dinakpan ang usa ka plastic nga hinigtan og lastiko nga adunay sulod nga gituohang shabu nga balor og P4.76 milyones.

Ang mga dinakpan nagtingkagol na sa selda sa Police Station 10 samtang nagpaabot sa pagpasaka sa tukmang kaso diin gisusi pa sab sa kapolisan kung diin gikan ang maong ginadiling drugas.

Tak-om ang mga dinakpan ug igo nalang sa paglingo-lingo ug pagpaagas sa ilang mga luha.

Sa laing bahin nadakpan ang unom ka pusher og shabu sa managlahing buy-bust operation sa kapolisan sa Lapu-Lapu City Police Office (LLCPO) hinungdan sa pagkasakmit sa mokabat P300,000 nga kantidad sa shabu sa Barangay Canjulao sa maong dakbayan niadtong Martes sa gabii.

Nunot sa maong operasyon nadakpan ang pusher nga giila nga si Jose Olardo Premacio, 62, construction worker nga nagpuyo sa maong dapit.

Nasakmit gikan sa maong dinakpan ang unom ka gagmay nga pakete sa shabu, P1,000 nga buy-bust money ug P500 nga gituohang halin niini.

Laing pusher nga nadakpan sa Purok Gumamela, Barangay Looc sa maong dakbayan giila nga si Elde Montecioso, 28, ug Socrates Suliano, 25, nagpuyo sa maong dapit ug nasakmit gikan kanila ang kapin sa 1.51 gramo nga gidaghanon sa shabu; P1,000 nga buy-bust money ug P500 nga halin niini.

Dugang nadakpan mao si Ethni Alexander Aceveda Garsula, 19, taga Sitio Kagudoy, Basak sa maong dakbayan kinsa nakuhaan og usa ka medium-size ug unom ka gagmay nga pakete sa shabu, P300 nga buy-bust money ug P300 nga halin niini.

Ang kapolisan nakasikop sab sa duha ka pusher sa may IAU Dormitory sa Sitio Kagudoy, Basak sa niaging tungang gabii.

Giila ang mga nadakpan nga sila si Belzhomer Reyes Ecalante, 19, taga Valencia, Bohol ug kauban niini ang usa ka John Carlo Vicente Taperre, hingkod, kinsa nakuhaan og 14 ka gagmay nga pakete sa shabu ug P300 nga buy-bust money. (Romeo T. Limpangog/GMR)(BANAT NEWS)