Suspek sa tulis gipasakaan na og kaso

CEBU, Philippines — Usa sa mga suspek sa pagtulis ug pagpatay sa 21-anyos nga graduating student nailhan na og pasakaan na og kaso.

Ang hepe sa Investigation Detection and Management Branch nga si Police Lieutenant Colonel Frankie Jingle Lugo mibutyag sa Banat News nga ang nailhang suspek mao si Rizford Laurez, taga Duljo-Fatima, Dakbayan sa Sugbo.

Matud pa nga gipasakaan na nila si Luarez og kasong robbery with homicide sa city prosecutor niadto pang Abril 5.

Samtang apil nga gipasakaan og robbery ang kauban niini bisan pa man og wala pa mailhi, gibutang lang usa siya nga John Doe sa maong kaso. Si Laurez ang gitumbok nga mipusil-patay kang Jovanie Pat, tinun-an sa kursong Bachelor of Science in Elementary Education ug gilauman nga mogradwar karong Oktrubre.

Matud pa ni Lugo nga ang gunman ra ang positibong nailhan sa saksi sanglit siya ra ang wala nagsul-ob og helmet samtang ang drayber sa motorsiklo nga gisakyan nagsul-ob og helmet.

Gibutayag ni Lugo nga sa gipaladmang imbestigasyon, nasuta nga ang babayeng kauban ni Pat mao gyuy target sa riding-in-tandem nga mga tulisan apan giingong misuway og sukol si Pat hinungdan nga gipusil kini.

Si Police Major Keith Allen Andaya, hepe sa Labangon Police Station miingon nga ang saksi nga nakatumbok sa gunman giingong silingan ra sa suspek.

Dugang gibutyag ni Andaya mao nga usa ka notadong kawatan ang nailhang suspek apan negatibo nga sakop kini sa Ozamis Boys.

“Local robber, unya noted drug user. Theft and robber in their area, Ma’am, not member of Ozamis Boys,” sigon ni Andaya.

Mohunong usa ang kapolisan sa pagpahigayon og manhunt operation batok sa suspek sanglit napasaka na ang kaso. Huwaton na lang nga mogawas ang warrant of arrest batok nila aron madakpan kini.

Apan samtang nagdagan ang kaso, giingong dili sila moundang sa pag-ila sa kauban niini.

sa alas 10 sa gabii, naglakaw si Pat kauban ang higalang babaye gikan sa ilang simbahan sa dalan Katipunan paingon sa boarding house sa babaye sa may dalan Tres de Abril sa Brgy. Labangon. Ug sa dihang gihunongan ang duha og riding-in-tandem ug gitulis sila, apan giingong misukol si Pat maong gipusil kini sa suspek ug naigo kini sa bugan. (/DILT)(BANATNEWS)