Isyu sa police station gisagulan og politika
CEBU, Philippines – Nanawagan ang kapolisan nga dili unta sagulan og politika ang isyu kabahin sa lunang tukuran sa Pardo Police station sa Barangay Inayawan, ning syudad.
Ang kadagkoan sa kapolis miingon nga kinahanglang butangan og polis ang maong barangay sanglit giingong kritikal kini nga mamahimong susama ka ‘drug infested’ barangay sa silingan niini nga Barangay Tangke, Talisay City.
Nasayran nga modagan pagka-Cebu South District Councilor ang incumbent barangay kapitan sa Inayawan nga si Kirk Bryan Repollo.
Mitak-om na lang ang direktor sa Police Regional Office-7 nga si Police Brigadier General Debold Sinas sa maong isyu sanglit matud niya nga gisagulan na og pamulitika ang maong isyu.
Kahinumduman nga ang deed of donation sa maong yuta hinatag pa sa miaging administrasyon sa Inayawan.
Samtang ang direktor sa Cebu City Police Office nga si Police Colonel Royina Garma, atol sa press conference kagahapon, mihangyo sa kapitan nga pasagdan na lang sila total kompleto na ang mga legal nga dokumento niini.
Tataw ni Garma nga kaniadto, personal nga mihangyo kaniya si Repollo nga ibalhin na lang sa laing luna ang tukuran sa maong estasyonan.
Sa iyang bahin, si konsehal Dave Tumulak maningkamot nga masulbad ang kasungian tali nila ni Repollo ug Sinas.
Si Konsehal Tumulak, Chairman sa Committee on Public Order and Safety ug Deputy Mayor for Police Matters miingon tumong niya nga mag-istoryahanay sila si Repollo ug Sinas aron makab-ot ang solusyon unsay maayo alang sa Barangay Inayawan.
Dugang ni Tumulak, ang Kapitan ug police opisyal pulos public servant maong lain tan-awon matod pa sa publiko nga nag-unay sila og away. —Camille Pateres/LPM (BANAT NEWS)
- Latest
