CHR-7 moimbestigar sa nahitabo sa Tuburan

CEBU, Philippines — Imbestigahan sa Commission on Human Rights 7 ang mga polis nga mipahigayon og drug bust operation kang Jimby Casas diin miresulta sa pinusilay ug pagkamatay niini sa Tuburan District Hospital.

Ang direktor sa maong ahensya nga si Attorney Arvin Odron nagkanayon nga ang pokus sa ilang imbestigasyon mao ang pagsuta kon gipasagdan ba gyud ang maong suspek sa tambalanan hinungdan sa iyang kamatayon.

Apan iyang gipadayag sa Banat News nga kinahanglan usab masayran kon aduna bay nalapas nga tawhanong katungod ang mga polis sanglit sila maoy nakapusil kang Casas.

"We will look into the use by the police of their firearms resulting to the infliction of multiple gunshot wounds to the patient, as the use of firearms should be taken only as the last resort when the life of the police are put in imminent danger," si Odron miingon.

Hinuon gikonsiderar sa CHR-7 ang pagdala sa mga polis sa maong suspek ngadto sa tambalanan.

"Will be considered here is the effort of the operating police in bringing their wounded victim to the hospital as it shows their manifest respect on the right of the victim to life," si Odron nagkanayon.

Ang direktor sa Cebu Provincial Police Office nga si PSSupt. Manuel Javier Abrugena nagkanayon nga andam sila nga imbestigaran sa CHR. "It is the standard operating procedure of the police to bring anybody to the nearest hospital when one’s life is in danger and needs immediate medication. We value life and security of every individual," dugang sa maong direktor.

Ang hepe sa Tuburan Police Station nga si PSupt. Ismael Gauna midayeg sa inisyatibo sa mga operatiba nga dalhon ang samaran nga suspek sa tambalanan taliwa sa krimen nga nabuhat niini.

"Yung mga comment-comment nila dyan na 'oh ayan nanlaban na naman', kaya sabi ko nga kung ang polis natin ay may ginagawang kalokohan bakit pa dadalhin sa hospital yan na gustong buhayin di ba?," si Gauna nagkanayon.
Sa eksklusibong pakighinabi sa Banat News sa Officer-in-charge sa Tuburan Police Station nga si SPO4 Samuel Cañete, kini miingon nga giatiman sa mga nars ang dugoan nga suspek.

Pangagpas niya nga ang maong bidyo gikuha dihang bag-o pa gibalhin si Casas gikan sa patrol car ngadto sa hospital.

"Giatiman na oy, bag-o pa gani na naabot giingnan na mi nga dalhon nila sa Vicente Sotto (Memorial Medical Center)," si Cañete miingon.

Giingong aduna silay duha ka mga polis nga nagbantay sa maong suspek sa tambalanan.

Tug-an ni Cañete nga sa maong drug bust operation, miuna og pabuto si Casas ngadto sa polis nga poseur buyer ug maayo na lang kay mikagar ang pusil niini. "Gatuo gani ko nga napusilan gyud tog polis namo. Kaduha gud to siya nagpabuto," sigon sa maong polis.

Human sa maong operasyon,  dali nga gisakay sa mga operatiba si Casas sa ilang patrol car paingon sa tambalanan.

Mikatap sa social media ang bidyo diin nagpakitabang ang dugoang si Casas sa mga staff sa Tuburan District Hospital. Giimbestigahan kini karon sa kadagkuan sa Probinsiya sa Sugbo aron masuta kon aduna bay pagkuwang ang mga staff sa maong tambalanan. (/DILT)(BANATNEWS)