‘Wa atimana’ maong namatay?

CEBU, Philippines – Mohimo og imbestigasyon ang Commission on Human Rights 7 bahin sa nag trending nga video sa usa ka lalaking drug suspect nga napusilan atol sa buy-bust operations kinsa gidala sa Tuburan District Hospital apan giingong gipasagdan ug namatay na lang.

Sa video makita ang nagkadugo ug nag-alindasay nga si Gembe Casas, 23, taga Sitio Toong, Barangay Cogon sa maong lungsod diha sa emergency room sa maong tambalanan niadtong adlaw nga Biyernes.

Samtang naglimbasog si Casas nga mabuhi apan diha sa video walay makitang kawani sa tambalanan sa tupad niini nga niatiman kaniya.

Sa Facebook post nga nag-viral makita nga naglisod og ginhawa si Casas apan giingong walay nakitang gitaod nga oxygen ug dextrose. Duna pay alegasyon nga sa pagsige niini og limbag-limbag natagak pa kini sa iyang gihigdaan ug namatay.

Si Atty. Arvin Odron, Regional Director sa CHR-7 mopadala og mga imbestigador aron sutaon ang alegasyon sa maong viral video.

Dugang pa ni Odron ilang tan-awon ang tanang aspeto lakip usab kung aduna bay mga lapso o pagpabaya ang tambalanan. Ilang tan-awon kun gihikawan ba sa iyang katungod ang biktima kun tungod ba sa pagpasagad sa mga nag-atiman maoy hinungdan nga namatay kini.

Suway nga gikuhaan og pamahayag sa Banat News ang Tuburan District Hospital, apan matud pa ni Job Bringoli sa admin office wala ang ilang Chief of Hospital na si Dr. Esteban Ligaray tungod kay naka- leave ug kini lang ang bugtong makahatag ug pamahayag,

Wala sab siya mohimakak o moangkon kun sa ila bang tambalanan gidala si Casas.

Si Police Officer 3 Achiles Bacorta, Desk Officer sa Tuburan Police Station nikonpirmar sa Banat News nga aduna silay buy bust operation niadtong Pebrero 8 sa alas 9:10 sa gabii sa may Sitio Toong, Barangay Cogon sa maong lungsod, diin ang subject mao si Gembe Casas. Ang operasyon gipangulohan ni Senior Police Officer 4 Samuel Cañete.

Sumala pa ni Bacorta pagkabantay ni Casas nga police ang nagpalit kaniya og drugas nibunot kini sa iyang armas ug gipusil kini apan wala nakaigo hinungdan nga nabawsan sa tiil.

Apan imbes motahan nakigpinusilay kini hinungdan nga nausban pagpusil diha sa iyang lawas.  Gidala kini  sa tambalanan apan namatay didto.

Gibutyag ni Bacorta nasakmit gikan kang Casas ang mga pinutos sa ginadili nga drugas, buy bust money ug armas.

Apan ang mga paryente sa namatay nanawagan og hustisya kay dili sila kadawat sa gidangatan niini.

Samtang walay gihatag nga impormasyon ang Tuburan District Hospital, apan gihimakak dayon sa Provincial Health Office ang pasangil nga wala giatiman sa mga hospital personnel si Casas.

Si Dr. Rene Catan ang pangulo sa PHO nagkanayon nga giatiman sa mga medical personnel si Casas kinsa niadtong tungora dunay daghang samad pinusilan.

“Ang iyang major injury actually ang iyang airways, dila (nabungkag)niya, ang cheek niya hasta ang lateral neck. Tan-aw gani nako siguro nalunod siya sa iyang kaugalingong dugo ba, kay ang trachea man ni, and so ga-bleed na siya it goes directly to your lung,” eksplinasyon pa ni Catan.

Gidala sa kapolisan sa Tuburan District Hospital si Casas alas 9:30 sa gabii apan matud ni Catan wala silay nakitang lapso sa pag-atiman kang Casas.

“Initial treatment gihatagan nila, actually naghatag sila og IV antibiotic, naghatag sila og LR (lactated ringers) fluids just to maintain iyang vital signs.  Unfortunately during sa time nga ila pang gi-stabilize ang pasyente didto siya ni-succumb, didto siya namatay sa hospital, in a span of one hour,” matud ni Catan.

Gitug-an usab niya nga maong walay hospital personnel nga nakita sa video samtang naglimbag-limbag si Casas kini tungod kay nipalayo sila kay nagsige kini og pangluwa.

“Una gyud, initially sa report, giduol gyud dayon siya. Ang nakit-an sa video nga walay tawo was because nangluwa naman ang pasyente, so naigo ang mga nurses so niretraka sila,” matud ni Catan.

Apan siya misaad nga may imbestigasyong himuon kalabot sa pag viral sa video.  Matud ni Catan, duha ka adlaw gikan sa insidente nihimo na og pakisusi si Dr. Ligaray ug tulo ka babayeng nurses ang gisuspenso tungod niini.

Sumala pa nga usa ka nurse maoy nikuha sa video ug gi-share niya kini sa kauban nga posibleng maoy ni-upload niini sa social media.

Matud ni Catan bawal ang pagkuha og hulagway ug video sa mga pasyente sanglit kalapasan kini sa ilang pribasiya. (Le Phyllis F. Antojado/IBM)(BANAT NEWS)