PNP nakadawat na sa P400 mil nga suporta sa siyudad

CEBU, Philippines — Nadawat na sa kadagkoan sa kapolisan sa region-7 ang P400 mil nga pinansiyal nga suporta gikan sa lokal nga kagamhanan sa Dakbayan sa Sugbo alang sa selebrasyon sa Sinulog.

Si Chief Superintendent Debold Sinas, direktor sa Police Regional Office (PRO)-7 nagpasalamat  sa kagamhanan sa siyudad  ug matud niya nga dili na sila magpa-refund sa ilang mga unang nagasto dihang wala pa nadawat ang maong pundo.

Kahinumduman nga giingong ni-release ang PRO-7 og P200 mil aron gamiton alang sa pagkaon sa kapin 6,000 ka personnel ug force multipliers nga maoy mobantay sa kalihukan sa Sinulog.

Gawas na kini sa 180 ka mga shifting police nga una nang gibutang sulod diha sa Basilica Minore del Santo Niño sanglit ang mga kaparian na ang niabaga sa pagkaon nila.

Nadesisyonan nga pagkaon ang ihatag sa mga mobantay diin matud ni Sinas nga kon kwarta ang ihatag posibleng mamiya kini sa ilang mga pwesto ang mga polis ug ubang bantay aron mopalit og pagkaon.

Matud usab ni Sinas nga aron hapsay gibahin-bahin nila sa sektor ang mga mobantay ug anaa silay tagsa-tagsa ka mga supplier sa pagkaon. (BANAT NEWS)