Mga pabutong nasakmit gi-dispose

CEBU, Philippines — Mga nakompiska nga pabuto ug pyrotechnics sa kapolisan sa dakbayan ug Probinsiya sa Sugbo niadtong pagsugat sa bag-ong tuig ang gipangbasa kagahapon isip pag-dispose niini.

Sa Cebu City Police Office gipangtapok ang tanang nasakmit nga pabuto ug pyrotechnics sukad niadtong Disyembre 28, 2018 hangtud na sa bisperas sa pagsugat sa bag-ong tuig.

Ang hepe sa Investigation and Detection Management Superintendent Leoncio Baliguat, Jr. ang nangulo sa operasyon.

Matud ni Baliguat nga mokabat ngadto sa P132,795 ang balor sa maong mga nasakmit nga pabuto nga ilang gipangbasa.

Samtang ang mga pabuto nga nibalor og P27,975 gikan sa mga nadakpan sa bisperas sa bag-ong tuig ila una kining gipreserba aron ipresentar isip ebidensya suporta sa kasong ilang gisang-at ngadto sa korte.

Butyag ni Baliguat nga aduna silay 27 kabuok nga nadakpan nga ilegal nga namaligya og mga pabuto.

Ang Mabolo Police Station adunay walo ka nasikop nga namaligya ug pabuto diha gawas sa designated area ug ang Carbon Police Station adunay walo usab ang nasikop.

Upat kabuok ang nasikop sa Mambaling Police Station, duha sa Waterfront Police Station ug duha usab sa Punta Princesa Police Station; usa sa Pari-an Police Station, usa sa Abellana Police Station, ug laing usa sa Sawang Police Station.

Samtang sa Cebu Provincial Police Office, kapin sa P700 mil ang balor sa mga pabuto ang ilang nasakmit ug gipanghumol usab kini og tubig usa gipanglabay.

Matud sa tigpamaba sa CPPO Superintendent Janette Rafter nga gikan sa Dakbayan sa Talisay ang daghang nasakmit nga pabuto ug mga pyrotechnics.

Samtang sa Dakbayan sa Lapu-Lapu ang direktor sa Lapu-Lapu City Police Office (LLCPO) Senior Superintendent Lemuel Obon ang nangulo sa paghumol sa mga pabuto nga ilang nasakmit diha sa baril nga dunay tubig kagahapon sa buntag.

Sa  nasayran kapin sa  P10,000  ang kantidad sa maong mga pabuto nga dugang nilang nasakmit diha sa Barangay Babag sa maong dakbayan. Romeo T. Limpangog, BDB (BANAT NEWS)