P5M druga nasakmit gikan sa babaye

CEBU, Philippines – Mokabat sa  P5 milyones nga kantidad sa gidudahang shabu ang nasakmit sa kapolisan gikan sa usa ka  babayeng ilang nadakpan sa  buy bust operation sa Barangay Subangdaku, Dakbayan sa Mandaue sa miaging gabii.

Si Police Superintendent Bernouli Abalos nga maoy hepe sa City Intelligence Branch (CIB) sa MCPO nangulo sa operasyon kauban ang hepe sa CDEU nga si Police Inspector Troy John Lalamonan.

Si Lalamonan mitug-an sa Banat News nga dugay na nilang gipanid-an ang suspek nga Belen Abellana, 36, ug kauban nga si Christian Quisol Pahan, 38, nga namaligya og drugas sa maong dapit.

Lakip sa nasikop ang 15 anyos nga lalaki nga taga Barangay Duljo Fatima, Dakbayan sa Sugbo nga naatlan sa kapolisan diha sa lugar. Upat  ka dagkong putos nga shabu nga nitimbang og 400 gramo nga mobalor P5 milyones  ang nasakmit gikan sa grupo.

Sa laing operasyon, nadakpan sab ang usa ka Marlon Moñasque Perez, 53, nga Job Order sa Dakbayan sa Lapu-Lapu diha merkado publiko sa Barangay Poblacion sa maong dakbayan nga nakuhaan og 13 ka paketeng shabu ug marked money nga P500 human sa buy bust operation. (Rowena Capistrano ug Nichole Alexis A. Abas, USJR Intern)/IBM)(BANAT NEWS)