Kilid sa underpass sa N. Bacalso ablihan

CEBU, Philippines – Karong Nobiyembre 24 gikatakda nga buksan sa Department of Public Works and Highways ang kilid nga bahin sa Natalio Bacalso Avenue diin nagpadayon ang pag-ugmad sa underpass project.

Apan ang operations chief sa Cebu City Transportation Office, Francisco Ouano, niasoy nga dili gihapon kini paagian og mga bus, mini-bus ug delivery truck.

“Tungod nga di pa gyud ingon ana kalig-on, so ang ato sad gi-priority ang kuan gyud ang mga PUJ gyud ug mga private,” matud ni Ouano. Ang mga diversion routes sama sa Caimito Street, Ganciang ug uban pa pwede gihapon nga maagian sa mga sakyanan. Gibana-bana nga mahuman ang maong proyekto karong Marso 28 sunod tuig. (Decemay P. Padilla/GMR)

Piniriso sa Naga CJ  di maigo sa CPDRC

Dili madawat tanan sa Cebu Provincial Detention and Rehabilitation Center (CPDRC) ang dili mominus sa 400 ka piniriso sa Naga City Jail.

Matud ni Reynaldo Valmoria, warden sa CPDRC, nga grabe kahuot na ang maong prisohan.

Sa pagkakaron aduna nay 3,777 ka piniriso ang CPDRC human gihunong nila ang pagdawat sukad niadtong Agosto 1, 2018.

Apan matud ni Valmoria nga kun mouyon ang gobernador nga modawat og piniriso gikan sa Naga City Jail, wala silay mahimo apan gamay lang.

Ang dili mominus 400 ka pinirio sa Naga City Jail ang kinahanglan ibakwit sanglit ang prisohan anaa nahimutang sulod sa one kilometer radius sa ground zero nga delikado sa pagdahili sa yuta sa Barangay Naalad sa maong dakbayan. (/GMR)(BANAT NEWS)