Tumulak giandaman og luna sa Team Rama

CEBU, Philippines – Gibutyag ni Konsehal Raymond Alvin Garcia sa Barug Team Rama PDP-Laban nga duna sila’y available slot alang kang Konsehal Dave Tumulak sa pagka-konsehal sa umaabot nga piniliay sunod tuig.

Ang pamahayag ni Garcia nitumaw human gikataho nga si Tumulak dili pa segurado nga modagan ubos sa Bando Osmeña Pundok Kauswagan (BOPK) o kun modagan kini sa iyang grupo giingong wala pay posisyon.

“So, we don’t like to preempt anything because possible man sad nga he will stick out with BOPK you know but I’m just letting you know we are opening up a slot for him for councilor under our banner,” asoy ni Garcia.

Si Tumulak sa iyang bahin nagpasalamat sa partido ni Garcia tungod kay taas ang ilang pagsalig nga mahiapil sa ilang grupo.

Apan si Tumulak nitataw nga ang importante sa tanan nga ipahibawo sa publiko nga siya magpapili gihapon kay siya nituo ug nisalig sa katawhan nga sila nagkinahanglan sa iyang pagpanerbisyo.

“Dungagan pa gyud nato atong pagserbisyo, ipakita nato sa atong mga katawhan ug tinuod gyud nga molansar pa ta diha sa konseho sa Siyudad sa Sugbo,” ni Tumulak pa.

Sa pangutana kun duna bay posibilidad nga moapil siya sa Barug Team Rama PDP-Laban o magpabilin sa BOPK, si Tumulak niingon nga mahibaw-an kini atol sa pagsang-at sa certificate of candidacy.

Ang kaalyado ni Tumulak nga si Konsehal Margarita Osmeña niingon nga apil sa slate sa BOPK si Tumulak sanglit wala sila’y nakitang problema sa relasyon sa mga sakop.

Gani gihulagway ni Osmeña nga asset sa BOPK ang tanan nilang miyembro.

Samtang si Association of Barangay Councils president ug Kasambagan Barangay Kapitan Franklyn Ong subling niklaro nga wala’y kamatuoran ang nanggawas nga taho nga sila ni Mayor Tomas Osmeña ang mag-tandem sa piniliay sunod tuig.

Gipaabot nga atol unya sa pagduso sa COC karong Oktubre 11 hangtud sa 17, mahibaw-an kun kinsa gyud ang mga kandidato sa Barug Team Rama PDP-Laban ug BOPK. (/GMR)(BANAT NEWS)