Kaso ni David Lim gibasura

CEBU, Philippines – Gibasura ang kasong frustrated homicide batok sa negosyante nga si David Lim human wala na motunga ang kihante niini.

Si Lim nga taga Maria Luisa Village, Banilad, Cebu City gipasanginlan nga nipusil kang Ephraim Nuñal, usa ka registered nurse, niadtong Marso 19, 2017 sa Sotto St., Barangay Kamputhaw, Cebu City.

Si Regional Trial Court Judge Ricky Jones Macabaya nibasura sa kaso ug gikompirmar sa iyang staff.

Si Nuñal, 33, taga P. Cañezares St., Dumlog, Talisay City napakyas sa pagtambong sa mga hearing gumikan sa iyang paglarga sa Estados Unidos human naaprobahan ang iyang immigration visa aron ikauban ang iyang pamilya.

Gihimakak ni Lim ang pasangil atol sa pagbasa sa kaso niadtong Agosto 15, 2017 hinungdan nga gipadayon ang hearing. Ang laing kaso ni Lim nga illegal possession of ammunition ang nagpabilin pa sa sala ni Judge Alexander Acosta sa RTC Branch 9. (/GMR)(BANAT NEWS)