Motor batok trak , babaye patay
CEBU, Philippines — Patay ang usa ka 48-anyos nga ginang human nabanggaan og usa ka 10-wheeler dump truck ang gisakyan niining motorsiklo diha sa Barangay Poblacion, Dakbayan sa Toledo niadtong Biyernes sa hapon.
Ang biktima giila nga si Jury Tolentino, nagpuyo sa Barangay Anopog, Pinamungajan.
Base sa gihimo nga imbestigasyon sa kapulisan sa Toledo nga angkas ang biktima sa usa ka motorsiklo nga gimaneho ni Juan Lumactod, 48, padung sa Pinamungajan.
Si Senior Police Officer 1 Bartomiano Gargar sa Toledo Police miingon nga gikasugat sa maong motorsiklo ang 10-wheeler dump truck nga gimaneho sa usa ka Maximo Payusan Jr., 27, nga giingong nawad-an og kontrol sa manobela ug nasungag ang motor.
Tungod sa kakusog sa impact sa panghitabo, nalabay si Tolentino ug naigo ang ulo sa kalsada, dali silang gidala sa tambalanan apan nakabsan sa kinabuhi ang ginang samtang nakaangkon lang og mga bun-og ug pangos si Lumactod.
Si Payusan anaa na karon sa kustodiya sa Toledo Police ug nagpaabot nga pasakaan og kaso sa pamilya sa biktima. (/IBM)(BANATNEWS)
- Latest
