P18- bilyon nga proyekto papugngan sa korte

CEBU, Philippines — Nidangop sa korte ang walo ka konsehal nga alyado sa Barug Team Rama aron ipadeklarar nga walay bili ang duha ka resolution labot sa P18 billion nga proyekto sa Kawit Island ug sa Barangay Binaliw.

Ang oposisyon sa konseho sa Dakbayan sa Sugbo nagtuo nga wala nasubay sa balaud ang pagpinirmahay ni Mayor Tomas Osmeña ug sa presidente sa Universal Hotels and Resorts, Inc. nga si Frederick Go og Joint Venture Agreement alang sa proyekto sa Kawit Island niadtong Biyernes sa Manila.

Buot sa mga konsehal nga ubos sa partidong Barug Team Rama nga makakuha og temporary restraining order ug writ of preliminary injunction gikan sa korte.

Sila si Osmeña, Konsehal David Tumulak, Margarita Osmeña, Sisinio Andales, Eugenio Gabuya Jr., Alvin Arcilla, Mary Ann De Los Santos, Jerry Guardo, Franklyn Ong ug Joy Augustus Young maoy ginganlan sa Team Rama nga respondent sa maong kaso.

Lakip sab sa respondent mao ang UHRI, Geofry Abroguena, developer sa landfill ug ang konseho sa Barangay Binaliw.

Matud sa mayor nga ang lakang sa oposisyon usa lang ka propaganda aron mahadlok ang mga investors nga mobubo og puhunan sa Kawit Island. Dugang ni Osmeña nga dili mosalir ang maong lakang sa oposisyon ug gani sugdan na nila ang groundbreaking ceremony sa P18 billion integrated resorts and casino sunod semana human sa pagpirmahay sa JVA.

Ang mayor nagtuo nga balido ang duha ka resolution samtang ang oposisyon nagtuo nga wala kini bili kay natangtang kini sa agenda sa ilang session niadtong Agosto 7 ug 8.

Nagtuo sab ang oposisyon nga walay katungod ang mga konsehal nga alyado sa Bando Osmeña Pundok Kauswagan kay na-adjourn na ang session dihang ilang gipasar ang duha ka resolution.

Gani bisan pa og wala ma-adjourn ang session, matud sa oposisyon nga walay katungod si Tumulak nga mamahimong presiding officer niadtong tungora.

Dason pa sa oposisyon nga tungod kay adjourned na man sila, ang siyam ka sakop sa BOPK kuwang gihapon aron makapa-reconvene sa session tungod kay wala sila kaabot sa quorum requirements kay siyam lang sa 19 ang naa. 

Gitataw sab sa oposisyon nga dili na mamahimong balikon pa og duso sa konseho ang duha ka resolution tungod kay hagbay ra kining gibasura. (/GMR)(BANATNEWS)