MTRCB mopahigayon og summit sa Sugbo

CEBU, Philippines – Sa unang higayon, ang Movie and Television Review and Classification Board (MTRCB) mopahigayon sa ilang tinuig nga kalihukan nga gitawag og "Family and Child Summit" sa Visayas ug Mindanao.

Sa ilang ika-unom nga tuig, ang MTRCB Family and Child Summit (FCS 6) magsentro sa tema nga "Cebu and its Place in Philippine Cinema History".

Ang Summit maghulagway sa centennial nga pagsaulog sa ika-100 nga tuig sa Philippine Cinema ug sa dakung natampo sa Cebuano Film Industry sa paghulma sa Philippine Cinema.

Magtagbo ang mga impluwensiyadong personalidad sa industriya sa pelikula ug telebisyon, sektor sa kabatan-onan ingon man mga ahensiya sa gobiyerno ug pribadong organisasyon sa Agosto 10, 2018 sa Social Hall, Cebu Provincial Capitol gikan alas 9 sa buntag hangtud sa alas 5 sa hapon. Gibanabana nga usa ka libo ka estudyante, akademiko ug sakop sa media ang magtagbo atol sa FCS 6.

Atol sa Summit, adunay lecture ug panel discussion gikan sa mga inila nga mga mamumulong sama sa Queen of Visayan Movies ug MTRCB Board Member nga si Gloria Sevilla, ang bantugan nga propesor nga si Nick Deocampo ug direktor nga si Jose Javier Reyes.

Ipasundayag sab nga libre alang sa mga partisipante sa FCS 6 ang Pista ng Pelikulang Pilipino (PPP) 2017 entry nga "Patay na si Hesus" nga gihimo sa usa ka Sugbuanon nga si Victor Villanueva.

Usa ka panel discussion sa pelikula ang mosunod human sa screening. (/GMR)(BANAT NEWS)