12 sikop sa managlahing buy-bust, 1 nakaeskapo

CEBU, Philippines — Nasikop ang upat ka tawo sa managlahi nga operasyon sa kapolisan sa Dakbayan sa Sugbo niadtong Lunes sa gabii samtang usa ang nakaeskapo.

Unang nasikop mao sila si Jason Devibar, 20, ulitawo; Rolando Devibar, 31, ug James Robert Macachor, 26, pulos residente sa Sitio Sta. Cruz, Barangay Luz, kinsa nasakmitan og mga pinutos nga drugas ug kagamitan sa pagsuyop.

Matud ni Senior Inspector Dindo Juanito Alaras sa Mabolo Police Station nga nipahigayon sila og buy-bust operation kauban ang Drug Enforcement Unit (DEU) nga niresulta sa pagkasikop sa mga suspek.

Laing nadakpan mao sila si Biniana Banosa, 53, taga Barangay Duljo Fatima samtang nakaeskapo si Bethlehim Banosa alyas Bimbo.

Nangulo sa buy-bust si Police Chief Inspector Randy Caballes, hepe sa Mambaling Police Station kauban ang DEU ug mga tinugyanan sa Philippine Drug Enforcement Agency.

Matud ni Caballes nga dali nga nakasibat si Bethlehim human nakabantay nga polis ang gikatransaksyon apan nasikop si Biniana human nakorner sa kapolisan.

Nasakmit gikan kang Biniana ang mga pinutos sa ginadili nga drugas hinungdan nga nagtingkagol na karon ang mga dinakpan sa prisohan samtang gipaabot ang pagsang-at sa tukmang kaso.

Sa laing bahin nasakmit sa kapolisan ang armas ug shabu sa nadakpang pusher sa Sitio Proper, Canamocan, Lungsod sa Compostela ug laing pito ka pusher sa Sitio Suba Masulog, Basak, Dakbayan sa Lapu-Lapu niadtong Lunes sa hapon.

Si Police Inspector Ruel Dinoy sa Compostela Police Station niila sa nadakpan nga si Francis Lloyd Malazarte, 29, nagpuyo sa maong dapit ug nasakmit gikan kaniya ang siyam ka gagmay nga pakete sa shabu, kalibre .45 nga armas nga adunay pito ka bala ug ang buy-bust money.

Ang dinakpan nagtingkagol na sa detention cell samtang pasakaan og kaso sa kalapasan sa Republic Act 9165 o Comprehensive Dangerous Drug Act of 2002 ug Republic Act 10591 o ang paghupot og armas nga walay lisensiya.

Nadakpan sab sa managlahing operasyon ang pito ka pusher sa mga sakop sa DEU sa Lapu-Lapu City Police Office ug nasakmit gikan kanila ang nagkantidad og P50,000 nga  shabu.

Si Police Chief Inspector Jaime Tolentino niila sa mga dinakpan nga sila si Rodney Tampus, 34; Renel Amodia, 30; Rodel Tampus, 36, pulos nagpuyo sa Sitio Suba Masulog, Basak, Dakbayan sa Lapu-Lapu, ug nasakmit gikan kanila ang 51 ka gagmay nga pakete sa shabu, P1,000 nga buy-bust money ug P500 nga gituohang        halin.

Laing nadakpan sa mao gihapong lugar sila si Reymond Amodia, 28; Brigido Labor, 34, trisikad driver; Wilton Bahenting, 24, tricycle driver, ug Ronald Bahenting, 22, pulos nagpuyo sa maong dapit ug nasakmit gikan kanila ang 21 ka gagmay nga pakete sa shabu, P300 nga buy-bust money ug P600 nga gituohang halin. (GMR) (BANAT NEWS)