Traffic sa N. Bacalso nakamenus sa kita sa CSBT
CEBU, Philippines — Nikunhod ang kita sa Cebu South Bus Terminal sa unang unom ka bulan karong tuiga kon itandi sa miaging tuig sa susamang period.
Sa tuig 2017, moabot ngadto sa P34.1 milyones ang kita sa terminal gikan sa bulan sa Enero ngadto sa bulan sa Hunyo, apan karon moabot na lang og P32.7 milyones ang kita sulod sa tunga sa tuig. Adunay deperensya nga P1.4 milyones.
Ang manager sa CSBT nga si Joey Herrera miingon nga nakatampo sa pagminus sa kita mao ang terminal fees kay naapektahan ang gidaghanon sa mga biyahe tungod sa problema sa trapiko.
Sa tuig 2017 moabot sa P20.2 milyones ang kita gikan sa terminal fee sulod sa unom ka bulan apan sa karong tuiga niabot ra kini og P19.3 milyones sa susamang period.
Laing gitan-aw usab ni Herrera mao ang renta sa mga namaligya sa terminal, sanglit sa miaging tuig, bag-o pa lang nila gipaabangan tanan stall o espasyo sulod sa terminal, nagpasabot kini nga nagbayad pa kaniadto og advance payment ug deposit ang gaabang apan karon, binulan na lang ang gibayran.
Tan-awon usab ni Herrera sa internal collection sa CSBT kon aduna bay problema. Hinoon positibo gihapon si Herrera nga makab-ot sa terminal ang target nga kita niini karong tuiga nga kapin 70 milyones pesos ilabi na sa peak season.
Nanghinaot siya nga mahuman og dali ang road project sa Department of Public Works and Highways (DPWH) sa N. Bacalso Avenue nga nakamugna og grabeng traffic. (/IBM)(BANATNEWS)
- Latest