10-wheeler truck natumba, drayber nakainom

CEBU, Philippines – Gitanggong sa Mandaue City Police Office ang drayber sa 10-wheeler delivery truck nga namatud-ang nakainom dihang aksidenteng natumba taliwala sa Ouano Avenue, Barangay Centro nga nakamugna og grabeng huot sa mga sakyanan nga nilungtad og kapin sa duha ka oras.

Si Police Officer 2 Ruben Dayon, field investigator sa Traffic Division sa MCPO, niila sa drayber sa Isuzu truck nga si Alex Simsano, 23, taga Tungkil, Minglanilla samtang ang truck boy nga naangil mao si Jobert Nellana, 20, taga Dakbayan sa Toledo.

Gikan sa Dakbayan sa Lapu-Lapu ang delivery truck nga nagkarga og 500 ka sako nga soya beans.

Ang drayber nangatarungan nga wala na mokupot ang brake sa sakyanan nga nakaaghat kaniya sa paggangi na lang sa manobela paingon sa daplin sa karsada hinungdan sa pagkatumba.

Matud ni Dayon nga nakamatikod sila sa drayber nga daw nakainom nga maoy nakaaghat kanila sa pagpaubos sa liquor test ug positibo ang resulta nga maoy gibasehan sa pagpasaka og kaso.

Samtang 35-anyos nga motorista nadasmag sa konkretong koral human nawagtangi og kontrol sa iyang gimanehong motorsiklo sa Colon, Dakbayan sa Naga niadtong Miyerkules sa buntag.

Ang nakalas giila nga si Bryan Cantila, residente sa Sitio Viking, Alaska Mambaling, Siyudad sa Sugbo, kinsa nakaangkon og pipila ka bun-og ilabi na sa iyang ulo ug dali nga gidala sa Minglanilla District Hospital apan gideklarar nga patay na ni Dr. Marvin Medina. Matud ni SPO1 Menandro Boligor nga gikan sa Dakbayan sa Sugbo ang biktima.

Sumala pa sa polis nga lapad ug patag ang karsada sa maong dapit apan gitawag og hilan sa mga residente tungod sa ubay-ubay na nga aksidente sa maong dapit. Wala sab natumbok kun nakainom ba ang biktima. “Mahibaw-an na siya unless kung atong ipa-autopsy,” matud ni Boligor. (Camille L. Pateres/GMR)(BANAT NEWS)