Killers sa med student gikiha

CEBU, Philippines — Hustisya ang singgit sa pamilya ug mga higala sa gidunggab patay nga 28- anyos nga babayeng tinun-an sa medisina sulod sa iyang boarding house didto sa  V.Rama, barangay Guadalupe, Dakbayan sa Sugbo niadtong Mayo 15.

Kagahapong adlawa gipasakaan og kasong murder ang gipasanginlang suspek sa maong krimen nga hangtod karon wala pa kini masikop.

Sumala pa ni PO3 Geoffrey Gutual, sa Homicide Section ang ilang gipangkasohan mao sila si Wilfredo Velez alyas Willy,56, residente sa barangay Kamputhaw, Dakbayan sa Sugbo, ug gikatahong kanhi uyab sa biktima nga si Amy Therese Cabataña,28, lumad nga taga Loay, Bohol.

Si Cabataña giingong usa ka registered nurse ug usa ka medical student sa usa sa mga iladong unibersidad dinhi sa dakbayan sa Sugbo.

Nasuta sa imbestigasyon nga si Velez ang katapusang nakauban sa biktima usa pa kini nakaplagang patay ug napuno na sa dinunggaban samtang nagsul-ob pa sa iyang puti nga uniporme.

Si Gutual miingon sa Banat News nga aduna silay nakuhang kopya sa footage sa CCTV ug drayber sa taksi nga makatabang sa kaso.

Ang abogado sa pamilya sa biktima nga si Atty. Erika de la Cerna miingon nga gihangop niini nga napasakaan na og kaso ang mga suspek. Giawhag hinuon niya nga hatagan og panahon ang nagbangotan nga pamilya nga wala pa mohatag og pamahayag bahin sa nahitabo. (IBM) (BANAT NEWS)