Negosyante gipatay

CEBU, Philippines — Patay ang usa ka negosyante human gipusil sa giingong riding-in-tandem sa Sitio Gisi, Barangay Agus,  Dakbayan sa Lapu-Lapu alas- 8 pasado ang takna sa miaging gabii.

Si  Police Officer 3 Marvin Saraum sa Homicide Section sa Lapu-Lapu  City Police Office (LLCPO)  miila sa biktima nga mao si Jessie Rama Sobrepeña, 37, nagpuyo sa maong dapit.

Matud pa ni Saraum nakigtabi sa iyang silingang si Hermes Godornes kilid sa dalan ang biktima dihang giduol ug gipusil kini sa makadaghang higayon sa lalaking mikanaog sa motor.

Pagkahagba sa biktima midagan sa nagpaabot nga motorsiklo ang mamumuno ug mipabulhot palayo sa maong lugar. Wala na madala sa tambalanan ang biktima.

Si Saraum miingon nga sa crime scene napalgan ang lima ka mga kabhang sa kalibre .45 ug usa ka deformed slug. Diha gihapon sa maong dapit nahitabo ang pagpusil patay niadtong Domingo sa gabii sa kanhi barangay kapitan sa Agus nga si Remegio “Bo” Oyao nga padayon pa nga gisusi sa kapolisan. (BANAT NEWS)