Indian national gipapatay sa asawa

CEBU, Philippines - Giangkon sa asawa sa Indian national nga siya ang nagpapatay sa iyang bana sa sulod sa lawak niini sa Barangay Tabunok, Dakbayan sa Talisay.

Si Usha Kaur, 22-anyos nga usa sab ka Indian national, nitug-an sa kapolisan nga nibayad siya og P30 mil aron patyon ang iyang bana.

Giingong gisugo niya ang iyang katabang nga si Rosemarie Genabi nga taga Siyudad sa Carcar sa pagpangita og tawo nga mopatay sa iyang bana kay wala na siya makaagwanta sa dinad-an niini. Nasayran nga wala na sila mag-usa og lawak kay pasakitan siya pirmi ug aduna na sab kini kapuyo nga Pinay ug aduna sila’y anak.

Giingong gibunalan og bara de kabra ang ulo ni Balvir Singh, 47-anyos sa duha ka lalaki nga kauban sa iyang katabang.

Matud ni PSInsp. Albert Quilotorio, deputy chief sa Talisay City Police Station nga nagpatabang sila og interpreter aron masabtan si Kaur.

 Dugang sa polis nga dili interesado nga mopasaka og kaso ang partido sa namatay apan sila mopasaka gyud ug bahala na ang korte niini. (BANAT NEWS)