Gikasab-an nagpakamatay

CEBU, Philippines - Nagpakamatay sulod sa ilang panimaye ang 17-anyos nga babaye kinsa giingong gikasab-an sa iyang inahan sa Campo 2, Dakbayan sa Talisay sa niaging adlaw. Matud sa inahan nga sukad iyang gikasab-an ang anak wala na kini motingog kanila ug nakit-an na lang niya kining nagbitay gamit ang wire sa telepono.

Konsehal Bas di katuo

Dili katuo si Konsehal Arturo Bas sa Siyudad sa Talisay nga namaligya og shabu ang iyang anak nga si Lagtang Barangay Kapitan Mark Ferdinand Bas.

Nagduda si Arturo nga tiggamitan og drugas ang iyang anak ug niundang na dihang aduna nay anak ug nahimong opisyal sa barangay. Ang amahan nga maoy chairman sa committee on peace and order sa konseho nahingangha na lang nga ika-upat sa listahan ang iyang anak nga high value target sa kapolisan.

Maestra gikawatan

Nabawi ra ang mga alahas nga nasakiyo sa kawatan nga nisaka sa panimalay sa usa ka magtutudlo sa Zone 5, Biasong, Dakbayan sa Talisay sa niaging gabii. Ang biktima mao si Amilyn Aniana, 31-anyos, minyo samtang ang suspek iya ra sab silingan nga si Jeffrey Lastimosa, 48-anyos, ug ang 16-anyos nga kauban kinsa nasikop ra sab sa kapolisan.

Nanghagad og suyop

Kritikal ang kahimtang sa usa ka lalaki human gipusil sa iyang higala sa Villa Lusita, San Isidro, Dakbayan sa Talisay niadtong Domingo sa gabii.  Ang biktima nga si Junvie Basia, 30, ulitawo, giingong nanghagad kini og suyop og ginadiling drugas sa iyang mga amigo. Gitawag sa iyang mga amigo ang biktima tungod kay dunay mga tawo nga nangita kaniya apan usa kanila ang nibunot og armas ug gipusil ang biktima tumong sa ulo hinungdan nga nahagba nga nagkadugo samtang nisibat ang nakapusil. (BANAT NEWS)