Davide, Magpale kuyog sa Tukhang karon

CEBU, Philippines - Mokuyog sila si Gobernador Hilario Davide III ug Bise Gob. Agnes Magpale sa ipahigayong Operation Tuktok Hangyo (Tukhang) sa kapolisan karong adlawa sa Lungsod sa Cordova.

Ang Tukhang dili lang sa gidudahang drug den apan lakip na ang mga cyber-porn den.

Ang hepe sa kapolisan sa probinsiya, Senior Superintendent Eric Noble, ang mangulo sa Tukhang.

Subling gipadayag ni Davide ang ilang suporta sa Presidente sa nasud batok ginadiling drugas.

Buot usab nila nga makabaton og kasinatian nga sila mismo ang mohangyo ngadto sa mga nalambigit sa ginadiling drugas ug sa ubang ilegal nga kalihukan.

Ang Cebu Provincial Police Office ang niimbitar kang Davide ug Magpale nga mouban sa ilang Tukhang.

Mouban sab ang mga sakop sa Provincial Women’s Commission alang sa cyber-porn. Mga lugar nga suruyon mao ang Barangay Poblacion ug Ibabao sa Lungsod sa Cordova. (BANAT NEWS)