Cebu chapters sa LMP ug ABC dili supak

CEBU, Philippines - Ang mga opisyal sa League of Municipalities of the Philippines (LMP) ug Association of Barangay Captains (ABC) sa Probinsiya sa Sugbo, dili supak sa pag-uktaba na usab sa piniliay sa Barangay ug Sangguniang Kabataan nga gikatakda karong buwan sa Oktubre.

Si Tuburan Mayor Aljun Diamate, kinsa mao usab ang presidente sa LMP-Cebu Chapter nagkanayon nga kun unsa ang gusto ni Presidente Rodrigo Duterte mao usab ang ilang suportahan.

Uyon usab niini si Celestino "Tining" Martinez III, ang suspendidong ex-officio member sa Cebu Provincial Board ug presidente sa ABC-Cebu Chapter.

Dugang ni Martinez nga angayan man ganing usbon ang termino sa mga opisyal sa barangay gikan sa tulo ka tuig ngadto sa lima.

"Mubo ra kaayo nang tulo ka tuig kay ang uban nga mga barangay di pa maka-implement sa ilang mga proyekto Unya eleksiyon na sad," matud pa ni Martinez.

Kahinumduman nga nipadayag si Presidente Duterte sa iyang panahom nga i-postpone  na sab ang Barangay ug SK elections tungod kay daku ang posibilidad nga gamiton sa mga drug lords ang ilang sapi aron mopadaug og ilang kandidato.

Matud pa ni Duterte nga inig human sa termino sa mga kapitan, buot niya nga ang mga mayor na ang mopili sa ilang mga kapitan. - /DILT) (BANAT NEWS)