Polis, ex-kagawad sikop
CEBU, Philippines - Giposasan sa mga sakop sa Provincial Intelligence Branch (PIB) ug Provincial Public Safety Company (PPSC) ang usa ka aktibong polis human kini nadakpan atol sa anti-drug operation diha sa Brgy Tabunok, Dakbayan sa Talisay.
Ang polis giila nga si Police Officer 1 Cielo Bonite nga taga Brgy Guadalupe, Cebu City ug nadestino sa Dumaguete City Police.
Gawas kaniya lakip sa nasikop ang target sa maong operasyon si Frederick Go, 46, negosyante ug laing duha ka mga tawo nga sila si Arnold Leceña, 59, ug Jaime Dela Cerna, 44.
Ang mga operatiba armado sa search warrant nga giisyu ni RTC Judge Jerry Dicdican sa Dakbayan sa Danao batok ni Go.
Nakuha sa mga polis gikan sa mga dinakpan ang usa ka KG9 sub-machine pistol, .22 magnum revolver , usa ka .45 caliber pistol, pinauga nga dahon sa marijuana, usa ka granada ug 45 gramos nga gituohang shabu nga mikantidad og tunga sa milyon ka pesos.
Lakip sa narekober sa mga operatiba ang .9mm pistol nga service firearm sa dinakpan nga polis. Wala nahibalo ang mga operatiba nga polis ang usa sa ilang mga nadakpan. Ayha ra nila kini nahibaw-an human nakuhaan sa iyang PNP ID.
Si Superintendent Mario Baquiran, hepe sa PPSC nga nahinabi sa mga tigbalita miingon nga dugay na nila nga gipanid-an ang kalihokan ni Go ug nalista kini isip “high value target” (HVT).
Nasayran usab nga kanhi konsehal sa barangay si Go ug anak kini sa kanhi konsehal sa dakbayan sa Talisay.
“Initial na paliwanag niya ay sabi niya, naanyayahan lang daw doon dumaan kasi siya pabalik na daw sa (kanyang) duty but then pag-alam naman natin na kapag ganyang cases, full–denial siyempre sa part nila.
Malaking ano namin na siya ay talagang involved sa drugs, ” sigun pa ni Baquiran bahin sa polis.
Si CCPO director Sr. Supt. Eric Noble miingon nga pasakaan og kasong kriminal ug administratiba ang polis.
Gawas kanila, laing upat nga gidudahang nalambigit sa ilegal nga drugas ang gidakop sa Talisay City Police sa Brgy Tanke nga niresulta sa pagkasakmit sa daghang pinaketeng shabu.Jojo Ugdol, Gabriel Bonjoc ug Rowena Capistrano (BANAT NEWS)
- Latest
