Hadlok buwagan sa uyab, priso naglaslas

CEBU, Philippines - Gitabang sa mga polis ug mga medical personnel ang usa ka piniriso sa Pardo Police Station human misuway paghikog pinaagi sa paglaslas sa iyang pulso sulod sa selda pasado alas 11 niadtong nakalabay nga adlaw tungod kay nahadlok buwagan sa uyab. Ang piniriso giila nga si Marvin Tura Cordova, nga nadakpan niadtong nakalabay nga semana human nakuhaan og drugas.

Ang desk officer sa Pardo Police nga si Senior Police Officer 1 Edgar Causon nga nahinabi sa Banat News miingon nga sa iyang nasayran naglaslas sa iyang pulso si Cordova human gikomedyahan sa iyang hinigugma nga bulagan sa pagduaw sa babaye nianang sayo pa.

Gamit ang blade maoy gilaslas niya sa iyang pulso hangtod nga naalarma ang mga kauban niini nga priso hinungdan nga dali sab nga nanawag sila og medical team  kay kini nakuyapan.

Hinuon luwas na sa peligro si Cordova ug gibalhin na kini sa Cebu City Jail samtang gisubay pa kung asa gikan ang blade ni Cordova. - /EIM) (BANAT NEWS)