Nubain gipalaman sa pan

CEBU, Philippines - Di na gayod makadu-aw sa iyang ka live-in partner ang 45- anyos nga babaye karong adlaw sa gugma human kini nadakpan kay nagdala og Nubain nga gipalaman sa pan nga Pranses sa dihang padung unta kini mosud sa Cebu City Jail kagahapon sa buntag.

Ang babaye giila nga si Mary Ann Labita nga taga  Basak-Pardo ning Dakbayan sa Sugbo kinsa miduaw sa iyang kapuyo nga napriso sa CCJ.

Si Jail Senior Inspector Bryan Roy Mercado, assistant warden sa CCJ nga nahinabi sa mga tigbalita nagkanayon nga nagdala og pan ang suspek apan sa paghiling sa mga guwardiya nabantayan nga adunay buslot ang mga pan hinungdan nga ila kining gibuak.

Sumala pa nga atol sa pagsusi nila ni Jail Officer 1 Harry Manabat ug Senior Jail Officer 2 Hazel Lumingkit didto  nasakpan ang druga.

Sulod sa mga pan narekober ang mga nubain nga miabot sa 19 ka ampoules  ug ang usa niini ang nabuak.

Matud pa ni Mercado wa muangkon ang suspetsado nga siya ang nagdala sa maong mga pan apan ang mga kauban niya nga dalaw mitudlo gyud kaniya nga siya maoy nagdala niini.

Sigun pa ni Mercado nga sa dihang nasakpan na gyud si Labita didto na kini mihilak ug mitug-an ug miangkon.

Sumala pa ni Mercado nga si Labita miingon nga igo lang gitunol niya ang putos sa pan sa usa ka tawo aron ipahatag sa usa sa mga piniriso sulod sa CCJ. Ang babaye miingon nga gisaaran kini og usa ka libo ka pesos kung iyaha na nga mahatag ang mga pan.

Si Mercado miingon nga misamot pagtiyabaw ang babaye sa dihang naabot ang iyang kapuyo nga priso nga posibleng wala nahibalo sa iyang gihimo. Ang inmate nga gitudlo sa babaye nga maoy iyang hatdan sa mga pan hugot usab nga milimod nga para iyaha ang mga pan.

Si Mercado mipasabot nga dili lang kini ang unang higayon nga nakadiskubre sila og drugas nga gipalusot sa prisohan apan kini ang pinakauna nga ang drugas gipasulod gamit ang pan.

Si Labita nga nahinabi sa Banat News hilabihan nga nakahilak sa dihang gipaslak na kini sa Guadalupe Police Station.

Usa sa gisayangan ni Labita nga nagplano na unta sila sa iyang duha ka anak edad 9 ug 12 anyos nga mobisita unta karong petsa 14 o bulan sa gugma sa maong prisohan.

"Nagsabot na unta mi nga mobisita mi sa ilang papa, excited na unta kaayo ‘to sila kay dugay na sila unta nga wala nakakita," matud pa ni Labita. Dugang pa  niya nga usa ka alyas Rolly nga bayot ang nanawag niya niadtong nakalabay nga gabii kay mamalihog og padala sa maong pan bugti sa usa ka libo ka pesos nga suhol.

Samtang pasado alas-11 sa buntag nadakpan usab sa female dorm sa Cebu City Jail ang usa ka 29 anyos nga babaye nga nakuhaan og usa ka pakete nga gituohang shabu sulod sa iyang karsones.

Giila ang suspetsdo nga si Mary Ann Estella Corporal, nga anak sa usa ka Estela Estella nga inmate sa maong prisohan nga dunay kaso sa drugas.

Si Jail Senior Insp. Stephanny Salazar , officer in-charge sa female dorm sa CCJ miingon nga wa moangkon si Corporal nga iya ang shabu nga nakuha sa iyang bulsa.

Matud pa niya, hinulaman ra niya ang maong pantalon diin nakuha ang maong druga.

Sumala pa ni Jail Senior Inspector Stephanny Sotero ang Jail Warden sa Female Dorm gi-body search ni Jail Officer 1 Mayfair Tablo si Corporal dihang nasakpan ang drugas nga una niyang gitug-an nga tawas. Jojo Ugdol ug Rowena Capistrano (BANAT NEWS)