Mahimo rang modagan sa laing barangay

CEBU, Philippines - Gitug-an sa pangulo sa Comelec sa Siyudad sa Talisay nga mahimo rang magpapili ang usa ka opisyal sa barangay sa lain sab nga barangay karong umaabot nga piniliay.

Gipasabot ni Atty. Gallardo Escobar, Comelec Officer nga aron mabuhat kini, kinahanglan nga buhian sa usa ka opisyal ang iyang kasamtangang katungdanan ug magparehistro dayon sa barangay kun diin siya nagtinguha nga magpapili.

Matud ni Escobar nga ang ingon ini nga paagi, mahimo kay ang gipangayo sa balaud mao ang 6-months residency sa usa ka tawo sa lugar nga siya nagparehistro.

Gani ang deadline sa pagparehistro natumong sa Abril 29 hinungdan nga kun Oktubre ang eleksyon, mahimo gyud kini.

Sigon pa niya nga ang Comelec, ministerial ang trabaho nga modawat lang kun unsay mga dokumento nga isumiter sa usa ka tawo o aplikante apan kun kuwestiyonon, mahimo sab kini. Apan matud ni Escobar nga dali ra kining malutsan. Gani daghang politiko nga nagserbisyo sa usa ka siyudad apan diay tua mag-ulian sa laing siyudad. (BANAT NEWS)