Uwan wa kabalda sa Cristo Rey

CEBU, Philippines - Bisan sa hulga sa uwan, wala kini nakatarug sa mga magtutuo nga nitambong sa Santos nga Misa sa Christ the King nga gipangulohan ni Cebu Archbishop Jose Palma atubangan sa Kapitolyo.

Matud sa Arsobispo nga ang kamatayon ni Cristo sa krus nagluwas sa katawhan gikan sa kaulipnan sa sala ug nagpakita sa iyang dakung kalooy.

Sumala pa ni Palma nga unta ang pagtuo sa katawhan dili lang kutob sa pagtambong sa misa ug prosesyon sa Cristo Rey kung dili ipadayon kini agi og pagpasidungog kang Cristo.

Dugang ni Palma nga mapasalamaton ang katawhan tungod sa gasa sa kinabuhi ug paghatag og respeto sa kinabuhi bisan gani ngadto sa mga nitahan sa ilang kinabuhi.

Si Palma mapasalamaton sa tanang programa nga gimugna alang sa katawhan ug malaumon siya nga molambo kini ug motubo aron aduna kanunay ang hustisya, gugma ug kalinaw, bisan taliwala sa gitak-upan na nga tuig sa kalooy.

Atol sa pagsaulog sa Christ the King, mao kini ang pagbukas sa Year of Parish as Communion of Communities.

Human sa Santos nga Misa gisunod ang prosesyon nga nanukad sa Kapitolyo ug gitapos sa usa ka benediction sa Cebu Metropolitan Cathedral.

Sumala pa ni Fr. Glenn Guanzon, pangulo sa liturgy sa Archdiocese of Cebu, nga usa ka dakung selebrasyon ang Christ the King tungod kay mao kini ang katapusan sa liturgical calendar celebration sa simbahan tungod kay sa sunod Domingo mao na ang unang Domingo sa adbento.

Si Police Inspector Gumersendo Mandawe, deputy chief sa Fuente Police Station, nitug-an nga dili mominus sa 6,000 ang nitambong sa gipahigayon nga Santos nga Misa. (BANAT NEWS)