Sugarol nisukol sa polis priso
CEBU, Philippines - Gibalhug sa bilangguan ang usa ka sugarol human nakwilyuhan sa polis nga nadestino sa Siyudad sa Sugbo niadtong nilabay’ng adlaw sa Sitio Cruzan, Bulacao, Dakbayan sa Talisay.
Ang nasikop mao si Agapito Ponce, 50-anyos, minyo nga nagpuyo sa Barangay Candulawan.
Si SPO1 Romualdo Torregosa nga nakaagi sa lugar dali nga nakakanaug sa iyang gisakyan ug gironda ang hantakan.
Dali nga nakasibat ang ubang mga sugarol apan si Ponce maoy naabtan ni Torregosa. Nipakita og pagsukol si Ponce hinungdan nga namugna ang paglinayugay hangtud nga napakalma sa polis ang suspek. Nakuha gikan ni Ponce ang duha ka 25 sentimo isip antugon o panalang ug P60 nga pusta.
Samtang duha ka aser sab ang gitanggong sa prisohan human gironda ang ilegal swertres outlet sa Barangay Tanke, Siyudad sa Talisay sa samang adlaw.
Nasikop sila si Ira Jera, 23-anyos, ug Gean Padillo, 22-anyos, pulos dalaga nga nagpuyo sa nahisgutang lugar.
Gironda sa kapolisan ang outlet ug positibong nakuhaan og mga tally sheets, mga ballpens, carbon paper, stapler, fax machine, calculator ug cash nga P415. (BANAT NEWS)
- Latest
