Walo ka warrants batok ni Florida

CEBU, Philippines – Nag-atubang karon og walo ka warrant of arrest si Michael Florida kinsa usa sa gitudlo nga suspek sa pagpanulis sa myGold Pawnshop sa dalan Colon sa niaging tuig ug laing tulis nga nahitabo sa Mindanao.

Matud ni Police Senior Inspector Ruel Burlat sa Regional Special Operations Group-7 nga human sa pagkasikop kang Florida nakig-coordinate ang Police Regional Office-7 sa laing rehiyon diin nasuta nga adunay tulo ka pending warrant of arrest sa PRO-9.

Ang tulo ka kaso mao ang robbery sa Pagadian City, Zamboanga del Sur; murder sa pagpusil patay ni Florida sa iyang kanhi kauban ug frustrated murder.

Atol sa pagkasikop kang Florida nakadawat og tawag ang RSOG-7 gikan sa Regional Trial Court Branch 58 nga nagpahibawo nga napalutsan na og warrant sa kasong pagpanulis sa myGold ug laing tulo ka warrants nga gi-served nila batok sa akusado.

Si Florida nasikop sa mga sakop sa RSOG-7 ug inubanan sa kapolisan sa Linamon, Lanao del Norte ug giila nga top 1 most wanted sa listahan sa Central Visayas.

Nakuha ni Florida kaniadto sa myGold mao ang P5.5 milyones ug P1.6 milyones gikan sa E-Bingo sa Dakbayan sa Mandaue niadtong niaging tuig. - /GMR) (BANAT NEWS)