3 patay sa aksidente sa motor

CEBU, Philippines – Tulo ang patay samtang usa ang naangol sa managlahing aksidente sa kadalanan dinhi sa Sugbo.

Patay ang driver sa motorsiklo ug angkas niini human mibangga sa 10-wheeler truck sa Brgy. Poblacion, Dalaguete sa nakalabay’ng adlaw.

Si Senior Police Officer 2 Renaldo Pinda, imbestigador sa Dalaguete Police Station nga nahinabi sa Banat News nagkanayon nga dead on the spot si Vincent Entrina, 17,  angkas sa motorsiklo sa namatay usab nga si Mario Pardillo, 26, pulos taga Sitio Malinglingon, Lamacan, lungsod sa Argao.

Ang nakadasmag kanila mao si Henry Lejita, 58, nga taga Hacienda Carmen, Murcia, Negros Occidental nga ilang nakasugat sa kurbadahong bahin sa karsada sa maong lugar.

Si Entrina gidala pa sa tambalanan apan gideklarar nga dead on arrival samtang si Pardillo gibalhin sa tambalanan sa Dakbayan sa Sugbo apan namatay ra usab human sa pipila ka oras sumala pa ni Pinda. Samtang patay ang usa ka lalaki nga nagsakay og motorsiklo ug nasamdan ang laing usa human sila nadasmagan og ambulansya nga naghatud og pasyente niadtong Lunes sa buntag diha sa Rabaya St. eskina Blanners sa Brgy. Tabunok, Dakbayan sa Talisay.  Ang nakabsan sa iyang kinabuhi mao si Procoro Clarido, 31, taga Brgy. Anapog, lungsod sa Pinamungajan.  Samtang samdan sa iyang tiil si Elmer Mahinay,33, nga naigo sa motor ni Clarido. Ang suspek nga nagmaneho sa ambulansya sa Talisay City District Hospital mao si George Basalo, 45. Matud pa ni SPO1 Junard Chiong sa Talisay City Traffic Division padung sa Siyudad sa Sugbu ang ambulansya dihang kalit nga nilabang ang motorsiklo ni Clarido ug naigo kini.  Si Clarido gikatahong nalabay ug napantok sa karsada.

Si Clarido ug si Mahinay gidala sa Talisay City District Hospital apan si Clarido maoy gideklarar nga dead on arrival. Eramy Sismar, CNU Intern/EIM