3 apartments ugdaw sa sunog

CEBU, Philippines - Naugdaw ang tulo ka paabangan nga apartment sa Sitio San Jose, dalan Sanciangko, Pari-an, Dakbayan sa Sugbo sa nakalabay nga gabii. Sumala pa ni Senior Fire Officer 3 Daniel Relatado sa Cebu City Fire Department nga ila’ng nadawat ang alarma sa sunog alas 11:30 sa gabii diin nagsugod ang sunog sa lawak nga giabangan ni Sammy Labueno.

Dali usab nga nidaku ang kayo ug nikatap sa tapad nga laing apartment.

Matud ni Relatado nga linya sa kuryente ang ila karong gisubay nga hinungdan sa hitabo human gikataho’ng nibuto ang circuit breaker sa apartment.

Paglabay sa 15-minutos nakontrolar usab sa kabomberuhan ang sunog diin lakip sa mga niresponde ang Chinese volunteer fire brigade bisan og ila’ng gisaulog ang Chinese New Year.

Gisaka hangtud sa ikaduha nga alarma ang sunog ug kini nagbilin og P250,000 nga danyos.

Ang tapad nga unibersidad sa mao’ng dapit ang naapektuhan usab og diyutay human nangabuak ang bildo gumikan sa kainit apan wala nakatabok ang kayo.

Gumikan kay sa sudlonon nahitabo ang sunog, si Relatado niingon nga usa sa ila’ng problema mao ang kagamay sa dalan ug nagsumpay-sumpay na lang sa mga hose ang mga bombero aron ila’ng mapawong ang kayo. Wala’y nadawat nga impormasyon ang kabomberuhan nga may naangol o namatay sa sunog.  (BANAT NEWS)