Pekeng polis sikop

CEBU, Philippines - Natanggong karon sa karsel sa buhatan sa CIDG-7 ang usa ka 31 anyos nga lalaki nga nagpa-polispolis kay nagsuot og uniporme  ug nagdala pa og toy gun dihang kini gidakop sa tinuod nga polis diha sa Barangay Basak ning Dakbayan sa Sugbo sa nakalabay nga buntag.

Ang nadakpan mao si Dojie Canindo, taga Lungsod sa Sibonga apan kasamtangan nga nagpuyo sa Barangay Quiot dinhi sa siyudad.

Ang pulis nga nakadakop kaniya mao si Police Officer 1 Boggart Sestoso Anor, nga nadestino sa Regional Public Safety Batallion-7.

Si Anor nga nahinabi sa mga tigbalita miingon nga paingon unta kini nga mo-duty para sa International Eucharistic Congress dihang iyang nakita si Canindo nga nagsuot og uniporme sa pulis sa barangay Basak.

Apan nagduda siya kay bisan kompleto kini sa uniporme wala kini name plate ug badge diha sa dughan. Iyang nakita si Canindo nga misakay og jeep hinungdan nga iya kini nga gisundan ug nagpaatbang siya niini.

Gipangutana ni Anor si Canindo kung unsa kini nga batch mi-graduate apan igo lang daw kini mitubag nga kini mitapos tuig 2013 ug nadestino kini karon sa City Intelligence Branch sa Cebu City Police Office.

Pag-abot sa N. Bacalso Avenue nakabantay og patrol car si Anor hinungdan nga iyang gipahunong ang jeep ug gipadakop si Canindo.Nakuha sa kapulisan gikan ni Canindo ang usa ka replica sa .9mm pistol ug uban pang mga gamit.

Si Canindo nga nahinabi sa mga tigbalita miangkon nga sukad pa sa iyang pagkabata gusto na siyang mamahimong pulis, apan high school ra iyang nahuman.

Nangaplay unta siya pagka-gwardiya apan dugay siyang gitawgan sa agency nga giaplayan maong ang kwartang hinatag sa iyang ginikanan panglukat og requirements iya na lang gipalit og uniporme sa polis.

Si Canindo miingon nga ganahan usab siya nga magsuot sa maong uniporme kay matag higayon nga mibisita kini sa iyang uyab sa Tejero dili kini hilabtan sa mga bugoy ug tawgon pa kini og “sir.” Kasohan siya og usurpation of persons in authority, paglapas sa Comelec gun ban  ug paghupot og replica nga armas. (BANAT NEWS)