Nagbiseklita sa Visita Iglesia

CEBU, Philippines - Nagbiseklita ang mga tinun-an ug alumni sa Don Bosco Technology Center sa ila’ng pagduyog sa Visita Iglesia sa pito ka simbahan isip kabahin sa kalihukan sa 51st International Eucharistic Congress.

Matud ni Fr. John Berniel Lopez, ang spiritual formator sa mga batan-on, nga nakig-ambit sila sa kalihukan sa IEC pinaagi sa gitawag og Biseklita Iglesia kuyog sa 25 ka mga tinun-an ug alumni.

Sumala pa ni Lopez nga matag parokya nga ila’ng bisitahan, mohimo gyud sila og pagyukbo ug pag-ampo sa Blessed Sacrament lakip ang pag-rosaryo. Gibutyag ni Lopez nga dili lang paugnat sa kusog ang gihimo nila sa mga batan-on, nakapaugnat pa usab kini sa ila’ng Espirituhanon nga pagtuo ug ang paghigugma sa kalikupan tungod kay wala’y aso nga namugna ang mga biseklita.

Ang nangulo sa grupo nga Bosconian Fixed Gear, Jess Niño Largo, nitug-an nga daku kaayo nila’ng kalipay sa higayon nga magtapok sila nga pulos mga batan-on ug magpahigayon og mga kalihukan nga makapalambo sa ila’ng pagkatawo.

Si Dr. Aliefa Amevi sa nasud sa Tongo, nitug-an sa Banat News nga nindot kaayo ang ila’ng kasinatian sa Visita Iglesia tungod kay nakita nila ang hugot nga pagtuo ug disiplina sa mga Pinoy panahon sa pagbalaan sa Ginoo.

Laing delegado gikan sa Italy nga si Elisabet Balboni nibutyag nga ika-upat na niya nga higayon nga nitambong sa IEC diin gidayeg usab niya ang kusog ug lig-on nga pagtuo sa mga Pilipino nga Katoliko.

Una niya nasinati ang grabe nga pagdagsa sa mga tawo sa Cebu Metropolitan Cathedral nga niuban sa Visita Iglesia.

Nagtuo si Balboni nga ang Visita Iglesia alang lang sa mga delegado apan nakurat siya diha’ng baga kaayo ang tawo nga nag-atang sa matag simbahan nga ila’ng gibisita niadto’ng Huwebes.

Pasabot niya nga bisan pa man og nagkalain-lain ang linggwahe nga gigamit, nakita niya ang pagkahiusa sa katawhan pinaagi sa Eukaristiya ug presensiya sa Ginoo.  (BANAT NEWS)