Sinulog grand parade route ibalhin

CEBU, Philippines - Tungod sa kahasol ug kagubot nga pirmeng magtangag panahon sa selebrasyon sa Sinulog matag tuig, plano karon nga ibalhin ang rota sa Sinulog Grand Parade sa sunod tuig.

Si Sinulog Foundation Inc. chairman suspended mayor Michael Rama gusto nga himuon ang parada diha sa  Block 27 nga nahimutang sa North Reclamation Area.

Matud ni Rama kini aron maibanan ang mga tawo nga magdasok diha sa Mango Avenue nga diin usab adunay daghang mga magpahigayon og street parties.

Nasayran nga sa nakalabay nga Sinulog, daghang gidili ang mga organizers sama sa liquor ban ug street parties diha kilid sa carousel route, apan wala kini matuman tungod kay grabe kadaghan ang mga tawo nga nisaksi sa selebrasyon.

Sumala pa sa kapolisan mokabat og 3.2 milyones ka tawo ang nisaksi sa maong kasaulogan.

 Ang Philippine National Police pinaagi sa Police Regional Office-7 maoy gitahasan sa pagbantay sa seguridad sa Sinulog mi-deploy og gibanabanang dul-an singko mil ka mga polis lakip na ang mga force multipliers gikan sa Central Command, mga unibersidad ug uban pa. Ang PNP aduna lamang kapin 200 mil ka mga sakop sa tibuok Pilipinas.

Giangkon ni Rama nga matag tuig grabe gyud kahuot sa mga tawo ang dakbayan ilabi na sa rota sa parada panahon sa Sinulog.

Usa usab sa hinungdan niini mao ang pagsulbong sa daghang mga dagkong malls sa dakbayan nga dugokon usab sa mga tawo nga gustong makasuroy niini dungan sa ilang pag-anhi alang sa Sinulog.

Sulod sa 37 ka tuig, naanad na ang mga tawo nga ang rota sa parada  manukad gikan sa N.Bacalso Avenue dayon mosubay sa P. Del Rosario, liko sa General Maxilom Avenue (Mango Avenue) tuyok sa Fuente Osmeña Rotunda lahos sa Osmeña Blvd.dayon lahos sa Cebu City Sports Complex diin himuon ang dance competitions.

Kagahapon, si Rama uban sa mga tigbalita nilibot sa bag-o nga rota sa parada nga manukad gikan sa dan General Maxilom Extension, A. Soriano, S. Osmeña ug lahos na ngadto sa Block 27. Buot usab ni Rama nga pakigkitaan ang Cebu construction community pinaagi ni Jose Dakay nga magpatabang sa pagpatrabaho sa grand stand diha sa Block 27.

Nagtuo si Rama nga mas modaghan pa unya ang makakita sa presentasyon sa Sinulog Grand Parade sa maong bag-ong rota.  Hinuon ang Sinulog sa dakbayan ug Lalawigan magpabilin gihapon diha sa Cebu City Sports Complex. (BANAT NEWS)