Biyuda gitigbas, batan-on gidunggab

CEBU, Philippines – Naangol ang 66-anyos nga biyuda nga gitigbas sa igsuong lalaki sa Yati, Lungsod sa Liloan alas 2 pasado sa hapon sa niagi’ng adlaw.

Si Police Officer 3 Arnold Labine sa Danao City Police Station niila sa biktima nga si Maria Bebita Moleño samtang ang iyang igsuon mao si Baltazar Montejo, 61-anyos, pulos nagpuyo sa maong dapit.

Matud pa nga nagkalalis ang managsuon labot sa problema sa ilang pamilya ug ang manghud nga daw gibati og kapungot nikuha og sundang ug gitigbas ang biktima nga nakaingon sa pagkasamad sa bukton.

Dali nga nisibat ang suspek ug ang biktima gidala sa iya’ng mga sakop sa pamilya sa Danao Provincial Hospital ug gibalhin sa Vicente Sotto Memorial Medical Center sa Dakbayan sa Sugbo.

Samtang naangol usab ang 15-anyos nga lalaki sa Santo Niño, Sabang, Dakbayan sa Danao nga gidunggab sa wala hiilhi’ng lalaki sa pagpauli niini gikan sa pagtambong og disco.

Nakabaton og samad dinunggaban sa walang kilid sa lawas ang biktima kinsa gidala sa Danao Provincial Hospital. – /GMR) (BANAT NEWS)