IEC paintings gisugdan na

CEBU, Philippines – Gidayandayanan na ang mga koral padulong sa Pavilion sa 51st International Eucharistic Congress sa Pope John Paul Avenue, Mabolo, Dakbayan sa Sugbo.

Mga nagkalainlaing desinyo may kalabutan sa IEC ang gipintal sa mga koral sa 29 ka artist sa Sugbo gikan sa nagkadaiyang grupo.

Gibutyag  ni Jun Dinglasa sa Cebu Artist Incorporated kinsa nipintal og usa ka hulagway sa modern stain glass sa IEC nga gihatagan sila og unom ka adlaw nga mahuman ang painting ug anaa pa siya sa ikaduha ka adlaw sa iyang pagdesinyo sa block nga gitahas kaniya.

Malaumon ra hinuon si Dinglasa nga sa wala pa ang gikatakda nga adlaw nga gihatag kanila, mahuman niya ang tahas.

Gitug-an ni Dinglasa nga aduna hinuon sila’y madawat gikan sa kadagkuan sa IEC bugti sa ilang kahago human sa ilang tahas.

Samtang si Engr. Rizal Camangyan sa iyang bahin sa Duros Construction nitug-an sa Banat News nga naa na sila karon sa finishing touches sa trabaho sa additional works sa IEC Pavilion sama sa pagpamintal sa gawas sa building niini ug ang pagtaud sa canopy sa atubangan.

Malaumon hinuon si Camangyan nga tulo ka adlaw sa dili pa ang pagbukas sa IEC mahuman na nila og clearing ang area ug wala na’y magtikaw-tikaw aron motrabaho sa lugar tungod kay sa pagka-karon naa pa sila 80 porsyento sa site development sa area sa tibuok seminaryo.

Gitug-an usab ni Camangyan nga donation sa usa ka painting company ang pintal nga gigamit alang sa pagpintal sa IEC Pavilion. – /GMR) (BANAT NEWS)