Misa de Gallo malampuson

CEBU, Philippines – Gihangop sa bag-ong direktor sa kapulisan sa Police Regional Office-7 ang pagkamalinawon sa paghimo sa Misa de Gallo lukop rehiyon sulod na sa pipila ka adlaw.

Kini ang gitug-an ni Chief Superintendent Manuel Gaerlan nga nahinabi sa mga tigbalita kagahapon.

Matud pa ni Gaerlan nga hangtod karon wala pa kini nakadawat og dagkong report gikan sa iyang mga sakop nga naglambigit sa maong tradisyonal nga relihiyosong kalihokan pagsugat sa Pasko.

Gipasabot ni Gaerlan nga nakatabang og dako ang bag-ong gipatuman niyang “general patrolling system”.

Si Gaerlan miingon nga lahi ang pagpatrolya ug lahi ang paggukod sa mga krimen nga nanghitabo sa mga lugar lakip na sa oras kun kanus-a pirmeng mahitabo ang krimen.

Sigun pa sa direktor mas hugot nga pagpatrolya ang himoon panahon nga manggawas sa mga balay ang mga tawo sama sa pagsimba, lakip na dinhi kung paingon na usab manguli ang mga tawo.

Sa pagsaulog sa Pasko ug sa Bag-ong Tuig, si Gaerlan nanawagan sa mga sibilyan ilabina kadtong adunay mga armas nga dili na magpabuto niini. Gibaharan usab niya ang mga polis nga dili gyud magpabuto sa ilang armas aron dili sila mag-atubang og kaso. – /EIM) (BANAT NEWS)