Demand reduction sa shabu hingusgan sa PNP

CEBU, Philippines – Human nga ang kapolisan malampuson nga mipamenos sa suplay sa shabu dinhi sa Central Visayas tungod sa sagunson nilang operasyon, tumong na usab nila karon mao ang “demand reduction.”

Nagpasabot kini nga hingusgan nila ang paghimo og mga programa nga momenos ang mga tawo nga mopalit og ilegal nga drugas.  Si Senior Superintendent Rey Lyndon Lawas, chief of the directorial staff sa Police Regional Office-7, mitataw nga sa milabay’ng 18 ka bulan nakasakmit sila og P37 milyones nga kantidad sa shabu.

Matud ni Lawas nga daku kaayong hagit karon sa kapolisan kun unsaon sa pagpakunhod ang “demand” sa shabu pinaagi sa pag-discourage sa mga tawo sa paggamit og shabu.

Giangkon ni Lawas nga pakyas pa sila sa pagpakunhod sa demand sa ilegal nga drugas apan hinuon napakunhoran na nila ang suplay sa shabu tungod sa sagunson nga pagkasakmit sa mga suplay.

Si Lawas miingon nga samtang may mga tawo pa nga mogamit og gidiling drugas, di g’yud kini hingpit nga mawala ang maong problema.

Giplano ni Lawas nga makigtambayayong sila sa mga opisyal sa barangay aron maila ang mga tawo nga tiggamitan og gidili nga matang sa drugas sa tagsa-tagsa nila ka dapit.

Matud ni Lawas nga ang mga opisyal sa kabarangayan maoy nakaila sa ilang mga katagilumolupyo kun unsay ilang mga bisyo ug daku kaayo sila og ikatabang sa kapolisan.

Si Lawas miingon nga kun wa nay mogamit og drugas, bisan pa og daghan ang mamaligya mapul-an na lang sila kay wala na may mopalit.  (BANAT NEWS)