Pinaskohan sa seniors, PWDs, LGU employees

CEBU, Philippines - Dagko og ngisi  karon ang mga senior citizens, persons with disabilities (PWDs)  ug mga empleyado tungod sa mga cash assistance nga pinaskohan kanila sa ilang mga lokal nga kagamhanan.

Sa Talisay City, human naaprubahan sa konseho kagahapon ang supplemental budget number 5 nga gipangayo ni Mayor Johnny de los Reyes aron sila mahatagan og dili muminos P30 mil.

Sa nasayran, ang mayor miduso sa laing supplemental budget number 5 nga nangayo og P23 milyones  alang sa ipanghatag nga bonus alang sa mga  kawani sa Talisay City ug mga job order employees.

Kadtong mga kawani nga nagsuweldo og P30 mil paubos ang makadawat og tag P30 mil, samtang kadtong mga kawani nga nagsuweldo og P30 mil pataas ang makadawat og bonus nga balig usa ka buwan.

Ang mga job order usab nga nagtrabaho sugod niadtong buwan sa Hulyo hangtud ning buwana, makadawat og tag P50 matag adlaw kwentahon kini hangtud ning buwan sa Disyembre.

Samtang sa Dakbayan sa Lapu-Lapu,  makadawat og financial assistance ang mga senior citizens ug persons with disabilities (PWDs) karong adlawa  isip pinaskohan.

Si Mayor Paz Radaza  mibutyag nga ang mga senior citizen hatagan og P2,500 samtang P2,000 ang madawat sa mga PWD. Adunay 19,000 ka mga senior citizen ug 2,200 ka mga PWD ang natala sa dakbayan karong tuiga.

Sa laing bahin, ang dul-an 10 mil ka mga PWDs sa Dakbayan sa Sugbo gikatakdang makadawat karong Huwebes sa ilang tagsa ka libo ka pesos sa unang hugna ug laing P1,000 gihapon sa dili pa ang Disyembre 23.

Gipahibalo ni City Treasurer Diwa Cuevas sa pakighinabi kaniya sa Banat News sama sa naandan adto ra gihapon makuha sa mga PWDs ang ilang financial assistance sa ilang tagsa-tagsa ka mga barangay.

Midugang si Cuevas nga sa sunod  tuig laraw nila nga limpyohan ang listahan sa mga senior citizens aron panangtangon ang mga nangamatay ug walay kuha-kuha sa ilang financial assistance aron masudlan na usab og bag-ong mga senior nga naa sa waiting list nga moabot sa 7,200. (BANAT NEWS)