14 mananagat gidakop sa Tuburan

CEBU, Philippines – Gidakop sa kapolisan ug mga sakop sa bantay dagat ang 14 ka tawo nga ilegal nga nanagat sa kadagatan sa Kamingawan, Tañon Strait, Lungsod sa Tuburan pasado ala-una sa nakalabay nga kadlawon.

Ang mga nasikop taga Lungsod sa Bantayan sa amihanang Sugbo ug Dakbayan sa Cadiz sa silingan nga Probinsiya sa Negros Occidental.

Matud ni Police Officer 3 Douglas Maravillas sa Tuburan Police Station nga nahinabi sa Banat News nga sakay sa F/B Genevieve 3 ang mga mananagat nga gipangulohan sa ila’ng kapitan nga si Amado Segovia, 48, nga taga Cadiz City.

Sumala pa ni Maravillas nga tayming nga nihimo og seaborne patrol ang kapolisan ug bantay dagat diin nasigpatan ang pagpangisda sa mga mananagat gamit ang “trawl fishing” nga gidili sa balaud.

Gawas nga ilegal ang gamit sa pagpanagat, pakyas usab ang kapitan sa panagatan sa pagpakita og permit aron managat sa Tuburan.

Narekober sa kapolisan gikan sa mga suspek ang 15 ka banyera sa nagkalain-laing isda nga kantidad og P15, 000.

Hinuon human nakabayad og P250 mil nga multa ang mga dinakpan sa paglapas sa municipal ordinance, gibuhian ra usab ang mga dinakpan.  – /GMR) (BANAT NEWS)